-گلگت بلتستان کے بعد اب کشمیر میں بھی پیپلز پارٹی واضح اکثریت سے جیتے گی: گورنر پنجاب

Uلاہور (اُردو پوائنٹ اخبارتازہ ترین - آن لائن۔ 18 جون2026ء) گورنر پنجاب سردار سلیم حیدر خان نے کہا ہے کہ گلگت بلتستان کے بعد اب کشمیر میں بھی پیپلز پارٹی واضح اکثریت سے جیتے گی۔ پیپلز پارٹی پاکستان کی واحد عوامی نمائندہ جماعت ہے جو عوام کی مشکلات کو سمجھتی ہے۔ پیپلز پارٹی نے ہمیشہ عوام کی فلاح و بہبود کے لیے کام کیا ہے۔ یہ بات انہوں نے آج یہاں گورنر ہاؤس لاہور میں اٹک کی تحصیل حضرو سے پیپلز پارٹی میں شمولیت کے لیے آنے والے نوجوانوں کی بڑی تعداد سے گفتگو کرتے ہوئے کہی۔

گورنر پنجاب نے شمولیت اختیار کرنے والے نوجوانوں کو مبارکباد اور خوش آمدید کہا۔ اس موقع پر گورنر پنجاب سردار سلیم حیدر خان نے کہا کہ گلگت بلتستان کے انتخابات کے بعد پیپلز پارٹی اب کشمیر میں بھی واضح اکثریت حاصل کرے گی۔

(جاری ہے)

انہوں نے کہا کہ بلاول بھٹو کو عوامی مینڈیٹ کے ساتھ وزیراعظم بنانے کے لیے ہمیں سخت محنت کرنا ہوگی۔ گورنر پنجاب نے کہا کہ پیپلز پارٹی میں شامل ہونے والے نوجوانوں کو کبھی تنہا نہیں چھوڑا جائے گا۔

انہوں نے کہا کہ پاکستان کے عوام پیپلز پارٹی پر اعتماد کا اظہار کر رہے ہیں۔ گورنر پنجاب نے مزید کہا کہ پیپلز پارٹی نے اپنے دور حکومت میں ہمیشہ عوام کو ریلیف دیا ہے۔ انہوں نے کہا کہ عوام آئندہ الیکشن میں پیپلز پارٹی کو کامیاب کرائیں۔ انہوں نے کہا کہ پیپلز پارٹی اقتدار میں آکر تنخواہوں میں نمایاں اضافہ کرے گی اور ملازمتوں کے مواقع پیدا کرے گی۔

بعد ازاں گورنر پنجاب سردار سلیم حیدر خان نے سندس فاؤنڈیشن میں عالمی ہفتہ عطیہ کے حوالے سے منعقدہ تقریب میں شرکت کی۔ تقریب سے خطاب کرتے ہوئے گورنر پنجاب سردار سلیم حیدر خان نے کہا کہ دکھ درد میں لوگوں کے چہروں پر مسکراہٹ لانا بہت بڑی نیکی ہے۔ انہوں نے کہا کہ سندس فاؤنڈیشن ایک قابل اعتماد ادارہ ہے جو دن رات تھیلیسیمیا کے مریضوں کی خدمت کر رہا ہے۔

گورنر پنجاب نے کہا کہ سندس فاؤنڈیشن تھیلیسیمیا، ہیموفیلیا اور خون کی دیگر بیماریوں میں مبتلا افراد کی زندگیاں بچانے میں اہم کردار ادا کر رہی ہے۔ انہوں نے کہا کہ منو بھائی مرحوم جیسے لوگ انسانیت کی خدمت کرنے والے عظیم انسان ہیں۔ انہوں نے کہا کہ ان کا سب سے قیمتی اور یادگار وقت ان لوگوں کے ساتھ گزارا ہوا وقت ہے۔ گورنر پنجاب نے کہا کہ مخیر حضرات اور فلاحی کام کرنے والوں کی حوصلہ افزائی کی جائے۔

انہوں نے کہا کہ مختلف بیماریوں میں مبتلا مریضوں کو خون ملنے پر کئی سال تک زندہ رہ سکتے ہیں۔ انہوں نے کہا کہ ضلع اٹک میں گردے کے کئی مریض ڈائیلاسز کی سہولت نہ ہونے کی وجہ سے انتقال کر جاتے ہیں۔ انہوں نے مزید کہا کہ سندس فاؤنڈیشن جیسے فلاحی اداروں کی ہر سطح پر حوصلہ افزائی کی جانی چاہیے۔ اس موقع پر گورنر پنجاب سردار سلیم حیدر خان نے میڈیا کے نمائندوں سے گفتگو کرتے ہوئے کہا کہ ایران امریکہ جنگ کے بعد سرمایہ کاروں کی توجہ پاکستان کی طرف ہے۔

حکومت اس موقع سے فائدہ اٹھائے اور سرمایہ کاروں کو راغب کرے۔ گورنر پنجاب نے کہا کہ پاکستان نے امریکا اور ایران کے درمیان امن معاہدے میں بہت کامیاب سفارت کاری کی ہے۔ انہوں نے کہا کہ ایران امریکہ جنگ بندی سے بہتری کی توقع ہے اور وہ فیلڈ مارشل سید عاصم منیر، صدر آصف علی زرداری، وزیراعظم اور وفاقی وزیر داخلہ محسن نقوی کو مبارکباد پیش کرتے ہیں۔

انہوں نے کہا کہ صدر آصف علی زرداری نے 2013 میں پاکستان ایران پائپ لائن معاہدے پر دستخط کیے، ایران پر سے پابندیاں اٹھانے کا سب سے بڑا فائدہ پاکستان کو ہوگا۔ ایران سے پائپ لائن سرحد تک پہنچ چکی ہے۔ یہ ہم سے 50 کلو میٹر دور ہے، اگر اسے 50 کلو میٹر کی لائن بچھا کر جوڑ دیا جائے تو ہمارے توانائی کے تمام مسائل حل ہو جائیں گے۔ سستی گیس ملے گی اور بجلی کا مسئلہ بھی حل ہو جائے گا۔

بجٹ کے حوالے سے پوچھے گئے سوال کے جواب میں گورنر پنجاب نے کہا کہ میرا ذاتی خیال ہے کہ تنخواہوں میں سات فیصد اضافہ کچھ نہیں۔ انہوں نے مزید کہا کہ سرکاری ملازمین، پنشنرز اور نچلے متوسط ??طبقے سمیت عوام مہنگائی کی وجہ سے ہاتھ پاؤں مار رہے ہیں۔ ایک اور سوال کے جواب میں انہوں نے کہا کہ گلگت بلتستان کا مینڈیٹ پیپلز پارٹی کا ہے۔ گلگت بلتستان اور کشمیر کے عوام نے جو مینڈیٹ دیا ہے اس کا احترام کیا جانا چاہیے۔

انہوں نے کہا کہ پنجاب کے تمام حصوں میں ان کی یکساں ترقی ہونی چاہیے۔ اس موقع پر گورنر پنجاب سردار سلیم حیدر خان نے خون کے عطیات دینے والوں میں اسناد تقسیم کیں۔ تقریب میں ارشد انصاری صدر پریس کلب محمد یاسین خان، صدر سندس فاؤنڈیشن، سینئر صحافی سہیل وڑائچ، عائشہ منظور وٹو، ڈی جی پیمرا نظام الدین اور چیئرپرسن ڈویلپمنٹ کمیونیکیشن ڈیپارٹمنٹ پنجاب یونیورسٹی ڈاکٹر عائشہ اشفاق بھی موجود تھیں۔