Hai Bhi Aur Phir Nazar Nahin Aati, Urdu Ghazal By Anwar Dehlvi

hai bhi aur phir nazar nahin aati
dhyan mein wo kamar nahin aati

mangta hun magar nahin aati
ye ajal waqt par nahin aati

tere kushton ka roz-e-hashr hisab
ghairat o fitna-gar nahin aati

taba apni bhi ek aandhi hai
KHak uDani magar nahin aati

abr kis kis tarah barasta hai
sharm ai chashm-e-tar nahin aati

tum to yun mahw-e-zulm ho ki hamin
aah karni magar nahin aati

nazr kuchh kar ke dil ko le ki ye jins
muft ai muft-bar nahin aati

muKHtasar haal-e-dard-e-dil ye hai
maut ai chaaragar nahin aati

yarab aabaad ku-e-yar rahe
ki qayamat idhar nahin aati

nind ka kaam garche aana hai
meri aankhon mein par nahin aati

be-tarah paDti hai nazar un ki
KHair dil ki nazar nahin aati

be-pari ne uDa rakha hai mujhe
hasrat-e-baal-o-par nahin aati

sab kuchh aata hai tu nahin aata
gar wafa sim-bar nahin aati

apni is aarzu ko kya kosun
aab wahan tegh par nahin aati

jaan deni to hum ko aati hai
dil ko taskin agar nahin aati

ghair kuchh mangta hai dekhen to
hai tumhein kis qadar nahin aati

dil ki apne jigar pe lun lekin
ek ki ek par nahin aati

dushman aur ek nigah mein lauT na jae
choT puri magar nahin aati

tera kucha hai misr-e-nazara
ki palaT kar nazar nahin aati

un ka aana to ek aana hai
maut bhi waqt par nahin aati

'anwar' is shab ki dekh lo taKHir
subh hoti nazar nahin aati