Yaad-e-rangin, Urdu Nazam By Dharmpal Aaqil

mere mahbub teri ulfat-e-sadiq pe nazan hun
tere husn-e-qayamat-KHez-o-rangin ka ghazal-KHwan hun
magar is teri tarz-e-ajnabiyyat par main hairan hun
tasalli de kabhi aakar mere qalb-e-pareshan ko

sharab-o-sher mein Dubi wo baaten yaad aati hain
teri masum si ulfat ki ghaten yaad aati hain
jo hanste bolte guzrin wo raaten yaad aati hain
liye phirta hun main aankhon mein yaadon ke gulistan ko

kahan wo din hain jab karte the hum baghat ki sairen
wo sawan ke mahine mein bhari barsat ki sairen
lab-e-ju chandni mein wo suhani raat ki sairen
nazar ab DhunDhti hai tere husn-e-kaif-saman ko

in ayyam-e-mohabbat mein maze kya kya nahin luTe
wufur-e-shauq mein katre nahin kya main ne gul-buTe
mera dil toDne wale kahin tera na dil TuTe
KHuda ke waste kar yaad apne ahd-o-paiman ko