Noon Walqalam, Urdu Nazam By Fozia Bashir Alvi

ہر دور کا ظالم ہوا ہم سے ہراساں

ہر دور کے مظلوم کی ہم آہ بنے ہیں

ہم اہل قلم ہیں

ہم بند زبانوں کا سلگتا ہوا لمحہ

ہم سرد لہروں میں بھی چنگاری بنے ہیں

ہم اہل قلم ہیں

قائل نہ کیا ہم کو زمانے کی جزا نے

ہم خود اپنے ہونے کی سزا بنے ہیں

ہم اہل قلم ہیں

ہوا وقت کا سورج نہ پابند سلاسل

ہم وقت کے سورج کے ساتھ کھڑے ہیں

ہم اہل قلم ہیں

ہم قرطاس کی ناؤ پہ سوار اک امید

اندیشوں کے طوفاں سے سر ساحل لڑے ہیں

ہم اہل قلم ہیں

ہم ریت کی دیوار پہ تحریر سچا حرف

خوف کی آندھی کے مقابل کھڑے ہیں

ہم اہل قلم ہیں

عجب تہمت الزام اپنے سر لیے ہیں

مر مر کے جیے ہیں کبھی جی جی کے مرے ہیں

ہم اہل قلم ہیں

ہم سلاح قلم تھامے ہوئے ہر آن

جا بہ جا بکھری صلیبوں سے لڑے ہیں

ہم اہل قلم ہیں

ہر گام تھامے ہوئے قلم کھڑے ہیں

ہر دور کے انسان کی پہچان بنے ہیں

ہم اہل قلم ہیں