Wo Main Aur Tum Hain! By Cyed Aly

وہ دور دیکھو وہ اس گگن میں

جہاں پہ خوابوں نے روپ دھارے

وہ دیکھو کرنوں سے جو بندھے ہیں

اسی فلک میں وہ دو ستارے

دو گل فروزاں

دو دیپ سوزاں

تمہاری آنکھوں کے استعارے !

وہ دو مسافر فلک کی جانب

ازل سے محو سفر رہے ہیں

اب اپنے ہاتھوں میں ہاتھ ڈالے

فلک کے زینے اتر رہے ہیں

لرزتے پاؤں !

برستی آنکھیں !

مقام ہجراں سے ڈر رہے ہیں

وہ دھیرے دھیرے کہ جیسے آنسو

چھلک رہے ہوں ڈھلک رہے ہوں

مچل رہے ہیں

وہ ڈھل رہے ہیں

وہ میں اور تم ہیں !

وہ دور دیکھو وہ اس گگن میں

وہ چاند جھلمل چمک رہا ہے

اسی گگن میں

کسی لگن میں

وہ کوئی بسمل بھٹک رہا ہے

وہ نیم شب میں دو خالی آنکھیں !

چکور چندا کو تک رہا ہے !

وہ کھوئی آنکھوں کی کھوئی دنیا !

جہاں پہ خوابوں کی دسترس ہے

وہ ایسی دنیا میں جی رہی ہیں

جہاں پہ ہر چیز خاک و خس ہے

زمان ہجراں !

مکان ہجراں !

جہاں پہ اک پل بھی سو برس ہے !

وہ چاند صورت !

اور ٹوٹی مورت !

وہ دونوں صدیوں سے چل رہے ہیں

وہ جل رہے ہیں

وہ میں اور تم ہیں !

وہ دو ستارے جو آسماں کے

حسین آنچل سے ٹوٹ جائیں

وہ چاند چہرے کی پیاری کرنیں

کسی کی آنکھوں کو لوٹ جائیں

تو کون جانے کہ یہ اشارے !

وہ خواب سارے

کسی کی آنکھوں سے روٹھ جائیں

تو کون مانے یہ استعارے !

وہ خالی آنکھیں وہ میری آنکھیں

وہ چاند کامل وہ تیرا چہرہ

وہ ایک بسمل وہ میری ہستی

وہ میرا حاصل وہ تیرا چہرہ

نہ چاند چہرے کی ضو گھٹے گی

نہ اس فلک کو پتہ چلے گا

کہ دور کوئی جو بس رہے تھے

اجڑ چکے ہیں

زمین خاکی کی خاک تھے جو

وہ آسماں سے بھی لڑ چکے ہیں

جو ان کی شاخوں میں جھومتے تھے

وہ گل فروزاں تو جھڑ چکے ہیں

وہ میں اور تم تھے !

وہ میں اور تم تھے!