Tere Likhy Huway Lafz By Masood Ahmad

تیرے لکھے ہوئے لفظ

تیری کہی ہوئی باتیں

آویزاں کر رکھی ہیں اپنے کمرے کی دیواروں پہ

تیری صبح کی کہی ہوئی باتیں

اذان کی مانند صبح دم جگا دیتی ہیں

آغاز یوں ہوتا ہے میرے دن کا

کبھی جو ملتے رہتے تھے پیغام تیرے

اور جواب در جواب چلتا تھا سلسلہ دن بھر

اب صبح سے شام کر دیتا ہوں۔ صرف منتظر ہی رہتا ہوں

پھر

کمرے کے دَر و دیوار جھانک لیتا ہوں

تکتا ہوں تیرے لکھے ہوئےلفظوں کو

تیری بولی ہوئی باتوں کو

جب بہت اداس ہو جاؤں تو

تیرے لفظ دیوار سے اُتارتا ہوں

پھر سے پڑھتا ہوں

نیا جواب سوچتا ہوں

پھر

دیواروں کو سونپ دیتا ہوں

کبھی تمہاری کہی باتیں

سرگوشیاں سی کرنے لگتی ہیں

اُن کو اتار کے کانوں سے لگالوں تو

تمہاری باتیں بول اُٹھتی ہیں

مدُھر جل ترنگ کی مانند

دن یوں بِیت کے شام میں ڈھل جاتا ہے

جیسے برف دھیرے سے

گھُل جاتی ہے وہسکی میں

کپکپاتے ہوئے اِک رات کے وہ لرزتے لمحات

جو میں نے اک طاق میں چھپا رکھے ہیں

جو صرف ہمارا راز تھے

اندھیرا ہوتے ہی لَو دینے لگتے ہیں

انہیں اوڑھ کے سونا چاہتا ہوں

تب وہ لفظ بہت سے ان جانے

رازوں کو بھی عیاں کر دیتے ہیں

نہ جانے کب انہی لمحات میں

سو جاتا ہوں

پھر

تیری صبح کی کہی ہوئی باتیں

اذان کی مانند صبح دم جگا دیتی ہیں

آغاز یوں ہوجاتا ہے میرے اک اور اگلے دن کا۔