سماجی ترقی میں بھرپور کردار ادا کرنے پرصدرِ پاکستان کی جانب سے اوآئی سی سی آئی ممبران کی تعریف

اس نمائش کے مہمانِ خصوصی صدرِ پاکستان جناب عارف علوی تھے جنہوں نے اپنے خطاب میں کہا کہ ملک بھر میں معاشرتی ترقی اور ہم وطنوں خصوصی طور غیر مراعات یافتہ طبقے کی زندگیوں کو بہتر بنانے میں غیر ملکی سرمایہ کاروں کے کردارکے بارے میں جان کر نہایت خوشی ہوئی۔

(جاری ہے)

انہوں نے مزید کہا کہ یہ ضروری ہے کہ نجی شعبہ ملک کے پسماندہ طبقے کو ترقی دینے کیلئے حکومت کے ساتھ مل کر کوششیں کرے۔ اس سلسلے میں اوآئی سی سی آئی کی ممبرکمپنیوں کا شکر گذار ہوں جنہوں نے کارپوریٹ سماجی ذمہ داریوں کے ایسے منصوبوں سے اپنی وابستگی کا مظاہرہ کیا جوہماری برادریوں کی زندگیوں کو بہتر بنانے میں مدد فراہم کررہے ہیں۔
اس موقع پر اوآئی سی سی آئی کی صدر شازیہ سید نے حوصلہ افزاء ریمارکس پر صدرِ پاکستان کا شکریہ ادا کرتے ہوئے کہا کہ سی ایس آر اوآئی سی سی آئی کے ممبران کے ڈی این اے کا حصہ ہے۔

ہماری ممبران کمپنیاں جن علاقوں میں کام کرتی ہیں ان کمیونیٹیز کی بہتری کیلئے پرعزم ہیں۔یہ صرف لفاظی نہیں بلکہ ہمارے کاروبار کا بنیادی حصہ ہے۔ہماری ممبران کچھ کمپنیاں قیامِ پاکستان سے ملک میں کام کررہی ہیں اور ان کے سی ایس آر منصوبوں نے گذشتہ کئی دہائیوں میں لاکھوں پاکستانیوں کی زندگیوں کو تبدیل کیا ہے۔
انہوں نے 2017میں اوآئی سی سی آئی کی جانب سے شروع کئے گئے پروگرام'OICCI Women' initiative پر بھی روشنی ڈالی۔

اس پروگرام کا مقصد اوآئی سی سی آئی کے ممبران کو ایک چھتری تلے یکجا کرکے خواتین کی جداگانہ شناخت اور شمولیت کیلئے ٹھوس اقدامات کئے جاسکیں اور اس سلسلے میں اعلیٰ کارکردگی کا مظاہر کرنے والے اوآئی سی سی آئی ممبران کے مابین 2018میںThe OICCI Women Empowerment Awards کا آغاز کیا گیا تھا۔
انہوں نے مزید بتایا کہ توانائی کے شعبے سے تعلق رکھنے والے اوآئی سی سی آئی کی ممبران کمپنیاں بڑے پیمانے پر قابلِ تجدید توانائی پیداکرکے اسے نیشنل گرڈ سے منسلک کرنے کیلئے بھرپور کوششیں کررہی ہیں تاکہ بجلی کی پیداوار کیلئے خام تیل کی درآمد پر اٹھنے والے بوجھ کو کم کرکے درآمدی بل کوگٹھا یا جاسکے۔

2018-19کے دوران اوآئی سی سی آئی ممبران نے سی ایس آر کے منصوبوں میں مجموعی طور پر 5.5ارب روپے کی سرمایہ کاری کرکے پورے پاکستان میں 58ملین افراد کوبراہِ راست امداد فراہم کی۔اوآئی سی سی آئی کے ممبران نے سوشل اور ڈیویلپمنٹ سیکٹر کی 160تنظیموں کے ساتھ ملکر سوشل ڈیویلپمنٹ کے کئی اہم منصوبوں پر 11,80,000انسانی گھنٹے صرف کیئے۔
ماضی میں سی ایس آر سرگرمیاں ملک بھر میں پھیلی ہوئی تھیں جن میں 32فیصد سندھ،27فیصد پنجاب،15فیصد کے پی کے ،10فیصد بلوچستان اور فاٹا ، گلگت، بلتستان اور آزاد کشمیر میں 16فیصدمیں کی گئیں۔

اس موقع پر اوآئی سی سی آئی کے سیکریٹری جنرل عبدالعلیم نے بتایا کہ پچھلے چند سالوں میں اوآئی سی سی آئی ممبران اور تمام اسٹیک ہولڈرز کی شراکت داری سے پائیدار ترقی کے منصوبوں میں نمایاں بہتری آئی ہے۔جس کے نتیجے میں خدمات کے معیار میں اضافہ اور پبلک پرائیوٹ شراکت داری کی وجہ سے زیاہ افراد کی مدد میں اضافہ ہوا ہے۔ہمار ی ممبر کمپنیوں نے تعلیم ، صحت، معاشرتی ترقی، ماحولیات اور انفرااسٹرکچرکے میدان میں سماجی خدمات میں حصہ لیا ہے۔نجی شعبے کی سی ایس آر اور پائیدار اقدامات کے ذریعے پسماندہ آبادی تک پہنچنے کی کوششیں نہ صرف زیادہ سے زیادہ نمایاں ہوتی جارہی ہیں بلکہ سول سوسائٹی نے ان کو تسلیم بھی کیا ہے۔