پاک چین دوستی کا نیا دور شروع ہو چکا ،چین پاکستان کے مسائل کے حل کیلئے بھر پور تعاون کر رہاہے محمد شہبازشریف ،

لاہور(اُردو پوائنٹ اخبار تازہ ترین۔28اگست۔2014ء ) وزیراعلیٰ پنجاب محمد شہبازشریف نے کہا ہے کہ پاک چین دوستی آزمائش کی ہر گھڑی میں پوری اتری ہے، ہرگزرتے لمحے کے ساتھ مضبوط ہوتا ہوا پاکستان اورچین کی دوستی کارشتہ نئے دور میں داخل ہوچکا ہے ،موجودہ جمہوری حکومت کے تحت جاری ترقیاتی عمل میں چین کی حکومت بھر پور تعاون کر رہی ہے اور پاکستان کے لئے تاریخ کا سب سے بڑا ترقیاتی پیکیج دے کر پاک چین دوستی کا تعلق بخوبی نبھایا ہے،پاکستان کے عوام ملک کے مختلف شعبوں کی ترقی میں چین کے لائق تحسین کردار پر چین کی قیادت، حکومت اور عوام کے شکرگزار ہیں،میرے حالیہ دورہ چین کے دوران چین اورپنجاب حکومت کے مابین پاکستانی ڈاکٹروں اورپیرا میڈیکل سٹاف کی چین کے بہترین ہسپتالوں میں تربیت کے معاہدے سے پاکستان اورچین کے تعلقات مزید مستحکم ہوں گے۔

(جاری ہے)

ان خیالات کا اظہار وزیراعلیٰ محمد شہبازشریف نے یہاں مختلف اضلاع سے تعلق رکھنے والے اراکین اسمبلی سے ملاقات کے دوران گفتگو کرتے ہوئے کیا۔وزیراعلیٰ نے کہا کہ حالیہ دورہ چین کے دوران چین کے حکام اورسرمایہ کاروں سے سود مند بات چیت ہوئی ہے ۔توانائی ،انفراسٹرکچر،ٹرانسپورٹ،صحت اوردیگر شعبوں میں تعاون مزید بڑھانے پراتفاق ہوا ہے۔چین کی سرمایہ کار کمپنیوں نے پاکستان بالخصوص پنجاب میں مختلف شعبوں میں سرمایہ کاری پر آمادگی کا اظہار کیا ہے جس سے یقیناسرمایہ کاری بڑھنے سے غربت اوربے روزگاری جیسے مسائل میں کمی لانے میں مدد ملے گی۔

انہوں نے کہا کہ ہمارے وفد کو دورہ چین کے دوران زبردست پذیرائی ملی ہے اوردوطرفہ تعاون بڑھانے کے حوالے سے سود مند پیشرفت ہوئی ہے۔پوری پاکستانی قوم ماہ ستمبر میں چین کے صدر کے دورہ پاکستان کے لئے تیار ہے اورچینی صدر کے دورہ پاکستان سے دونوں ممالک کے تعلقات مزید مستحکم ہوں گے۔انہوں نے کہا کہ پاکستان خطے کا خوش قسمت ملک ہے جسے چین جیسا بااعتماد ،مخلص اورسچا دوست میسر آیا ہے۔

چینی حکومت اورعوام پاکستان کو خوشحال اورترقی یافتہ ملک دیکھنا چاہتے ہیں اوریہی وجہ ہے کہ چینی کمپنیاں پاکستان میں بڑے پیمانے پر سرمایہ کاری کررہی ہیں ۔چین پاکستان کو درپیش مسائل کو بخوبی سمجھتا ہے اوروہ ملک کو مسائل کے گرداب سے نکالنے کے لئے ہر ممکن تعاون کررہا ہے ۔چین کے تعاون سے ہزاروں میگاواٹ بجلی کے منصوبے شروع کیے گئے ہیں جن کی تکمیل سے پاکستان کے عوام کو لوڈشیڈنگ کے عذاب سے نجات ملے گی۔

انہوں نے کہاکہ چین اورپنجاب حکومت کے مابین طے پانے والے معاہدے کے تحت چین کی حکومت اپنے اخراجات پر پاکستان کے ڈاکٹروں اورپیرا میڈیکل سٹاف کوطب کی جدید تربیت فراہم کرے گی جو چینی قیادت اور عوام کااپنے پاکستانی بھائیوں کے ساتھ دلی لگاوٴ کا اظہار ہے۔انہوں نے کہا کہ معاہدے کے تحت پنجاب کے ڈاکٹروں اور پیرا میڈیکل سٹاف کو چین کے بہترین ہسپتالوں میں ایمرجنسی اور آکو پنکچر طریقہ علاج کے بارے میں تربیت فراہم کی جائے گی جس سے پاکستانی ڈاکٹروں اورپیرا میڈیکل سٹاف کو شعبہ طب میں چین کی جدید ٹیکنالوجی سے آگاہی حاصل ہوں گی۔

انہوں نے کہا کہ پنجاب حکومت عوام کو جدید و معیاری طبی سہولیات کی فراہمی پر اربوں روپے کے وسائل صرف کررہی ہے اور صحت کے شعبہ کی ترقی کے لئے ٹھوس حکمت عملی اپنائی گئی ہے ۔انہوں نے کہاکہ صحت کے شعبہ کی بہتری اور عام آدمی کو معیاری طبی سہولیات کی فراہمی حکومت پنجاب کی ترجیحات میں شامل ہے۔چین سے شعبہ صحت میں تعاون کے حوالے سے طے پانے والا معاہدہ پنجاب میں صحت عامہ کی سہولتوں کو مزید بہتر بنانے کے سلسلے کی ایک اہم کڑی ہے ۔

انہوں نے کہا کہ حکومت وزیراعظم نواز شریف کی قیادت میں ملک کو مسائل سے نکال کر ترقی و خوشحالی کی منزل سے ہمکنار کرنے کے لئے سنجیدہ کاوشیں کررہی ہے ۔محنت ، دیانت ،امانت اور صبر وایثار کے سنہری اصولوں کو اپناتے ہوئے ہم اپنی منزل ضرور حاصل کریں گے اور پاکستان کو صحیح معنوں میں قائد و اقبال کا پاکستان بنانے میں کامیاب ہوں گے۔