Harm Kehta Hai Kuch Deer Bataan Kuch Or Kehta Hai, Urdu Ghazal By Afqar Mohani

حرم کہتا ہے کچھ دیر بتاں کچھ اور کہتا ہے

طریق منزل وارفتگاں کچھ اور کہتا ہے

ہر اک سے ان کا وحشی داستاں کچھ اور کہتا ہے

نہیں ہوتا جہاں کوئی وہاں کچھ اور کہتا ہے

امیر کارواں کیا ہے خدائے کارواں ہم تھے

مگر اب تو غبار کارواں کچھ اور کہتا ہے

ہر اک جلوہ میں اک پردہ ہر اک پردہ میں اک جلوہ

بہ ہر صورت سحاب درمیاں کچھ اور کہتا ہے

جناب شیخ کے لب پر خدا کا نام آتا ہے

صبوحی کش مگر وقت اذاں کچھ اور کہتا ہے

یہ مانا جنت حسن نظر تھی زندگی اپنی

مگر خمیازۂ عمر رواں کچھ اور کہتا ہے

مری ہستی کا ہر ذرہ ہے گنجائش طلب اب تک

کہ پا کر وسعت کون و مکاں کچھ اور کہتا ہے

قفس میں لاکھ سامان طرب صیاد ہے لیکن

مرا نالہ بہ نام آشیاں کچھ اور کہتا ہے

نہیں ہوتی ہے حجت ختم تنہا آب و دانہ پر

ارے صیاد اسیر بے زباں کچھ اور کہتا ہے

اتاری جا رہی ہیں قیدیوں کی بیڑیاں لیکن

نشان حلقۂ طوق گراں کچھ اور کہتا ہے

عجب الجھن میں ڈالا تو نے او منہ پھیرنے والے

کہ دل کچھ اور کہتا ہے گماں کچھ اور کہتا ہے

مرا ہر ایک سجدہ منتظر ہے قول فیصل کا

جبیں کچھ کہہ رہی ہے آستاں کچھ اور کہتا ہے

کلام میرؔ و مرزاؔ قابل صد ناز ہے افقرؔ

مگر مومنؔ کا انداز بیاں کچھ اور کہتا ہے