Zindagi Baqi Hai Ab Do Chaar Din, Urdu Ghazal By Jauhar Deobandi

zindagi baqi hai ab do chaar din
gin raha hai ye tera bimar din

shoKHiyon se kijiye pamal dil
hain tumhaare naz ke sarkar din

wo jo the ahd-e-jawani ke meri
kaise guzre barq ki raftar din

aap ne jab se nigahen pher lin
ho gae hain kaTne dushwar din

mah hai mubaf nayyar KHal-e-ruKH
zulf shab hai aur hai ruKHsar din

tum ulaT do apne ruKH se jo naqab
ho shabistan mein abhi bedar din

ashk pite hain ye baade ki jagah
kaTte hain is tarah mai-KHwar din

id ke din mil rahe hain wo gale
aisa aae din mein sau sau bar din

dar pe hain nazren kabhi hain baam par
yun guzarta hai tah-e-diwar din

sang-dil itni bhi ai shirin na ban
kohkan kaTe sar-e-kohsar din

tum baham shir-o-shakar ho kar raho
yun guzaro kafir-o-din-dar din

intizar-e-yusuf-e-dildar mein
roz guzre hai sar-e-bazar din

yaad-e-but hai aur qashqa bar-jabin
kaTta hun bandh kar zunnar din

jab se sauda chashm-o-abru ka hua
tir hain raaten mujhe talwar din

zindagi 'jauhar' thi jab rashk-e-bahaar
wah kya apne the wo gulzar din