Machchhar Se Jang, Urdu Nazam By Maqbool Ahmad Dehlvi

sunaun main apni shujaat ka qissa
dileri ka qissa himaqat ka qissa
masahri pe leTa jo sone ki KHatir
hua ek machchhar mere pas hazir
mujhe filmi gane sunane laga wo
meri nind ga kar uDane laga wo
kaha main ne machchhar miyan rahne do bas
kahin aur gao mujhe sone do bas
ye sun kar wo itna hua garm mujh par
ki fauran hi chehre pe aaya jhapaT kar
mere gal pe us ne zoron se kaTa
ki taklif se main bahut tilmilaya
do-hatthaD jo machchhar ke ghussa se mara
pakaD kar mere pair wo phir pukara
nahin marna itna aasan mujh ko
tera KHun pi kar hi chhoDunga tujh ko
ye kah kar mere panw par kaT khaya
main ek bar phir dard se tilmilaya
kai hath mare magar ware machchhar
laga hansne kamre ka chakkar laga kar
ghurur us ka mujh se na dekha gaya jab
mera ghussa had se siwa ho gaya jab
to main ne bhi chupke se hokey uTha kar
nazar apni machchhar ki jaanib uTha kar
ghuma kar zara main ne hokey jo mari
hui jaan machchhar ki allah ko pyari