Ji Han PiTe Hain, Urdu Nazam By Mukhtar Tonki

guDiya ki aankh phoDi
guDDe ki Tang toDi
wo hum pe hans rahi thi
gardan zara maroDi
munni ne ki shikayat
yun hum ne mar khai
ammi ne ki piTai
school se to bhage
Dale gale mein basta
raju ke sath dekha
bandar ka bas tamasha
ghar par ye baat pahunchi
hum ne na ki paDhai
ammi ne ki piTai
halwe ki baat chhoDo
kya seb ka murabba
ras-gulle aur barfi
makkhan ka sara Dabba
jo chiz bhi ki dekhi
hum ne chura ke khai
ammi ne ki piTai
sab samne the baiThe
Dhenchun ka rag gaya
papa ke doston ko
phir hum ne munh chiDhaya
itni si dil lagi par
shamat hamari aai
ammi ne ki piTai
bhayya to so rahe the
pankhe ko off kar ke
hum ho gae rawana
jebon ko saf kar ke
chhoTi si ye shararat
hum ko na ras aai
ammi ne ki piTai