Dastan E Ishq, Urdu Ghazal By Noman Ul Haq

وہ نہ آئے مگر رات بھر انتظار رہا

امید بھی رہی دل بھی بیقرار رہا

میخوار پی رہے تھے بھر بھر کے

نہ وہ آئے نہ کوئی پُر خُمار رہا

ہم کو معلوم تھا تم نہ آؤ گے

دل کو پھر بھی ترا انتظار رہا

سجائی محفل جو ہوشمندوں نے

اُن کے آنے پہ کوئی نہ بیدار رہا

رَزمِ حسن و جوانی کا تماشا تھا

اور ہمیں حاصِل شَرفِ دیدار رہا

اِک جھلک کیا دیکھ لی اُنکی

برسوں ہم پر اُن کا خُمار رہا

بھرا پڑا تھا چمن گُلابوں سے

مگر تَصَوُر میں تیرا رُخسار رہا

ہم تو کب سے اظہار پہ مائل تھے

لیکن یہی کام ہمیں دُشوار رہا

زندگی حالتِ طواف میں گزری

میں اُس مَحور کا صاحبِ مَدار رہا

یہ فریبِ جمالِ یار ہی تھا جو

حیاتِ فانی سے مُجھکو پیار رہا

شوقِ وَص٘ل وجہِ خوفِ وِصال تھا

ورنہ کون یہاں جینے کا روادار رہا

کیسا دھوکہ تھا تیرے وعدوں میں

کہ زندگی بھر زندگی پر اعتبار رہا

بِک رہا ہوں میں زمانوں سے

دل میں وہی ایک خریدار رہا

ہم کو جی جان سے محبت تھی

اُن کا محض تَعَلُّق ہی اُستوار رہا

ہم وفادار طلبگار پرستار گرفتار

وہ مگر نہایت سمجھ دار رہا

بچھائے پھول جِن کی راہوں میں

اُن کے گھر تک راستہ پُر خار رہا

پہلے کونسا صِلہ دیا تم نے

جاؤ یہ بھی تم سے اُدھار رہا

گِلے تو بے شُمار تھے لیکن

ایک آنسو سراپا اِظہار رہا

مُڑ کے دیکھا تھا ایک بار اس نے

وہی لمحہ تھا جو کہ یادگار رہا

تجھے بتایا تو ہو گا تاروں نے

کب تلک کوئی اَشک بار رہا

ترے کہنے سے کچھ نہیں ہوتا

اُس سے پوچھ جو ترا شکار رہا

عشق و بے وفائی، دونوں گناہ ٹھہرے

میں بھی گنہگار رہا تُو بھی گنہگار رہا

سوادِ درد کی منزل کو پا کر میں

اَشکبار رہا پھر بھی طلبگار رہا

آئنیے کو رگڑ رگڑ کے صاف کیا

مرا عکس پھر بھی پُر غُبار رہا