Chashm-e-bina Aur Ehsas-e-haqiqat Chahiye, Urdu Ghazal By Raj Kumari Suraj Kala Sarwar

chashm-e-bina aur ehsas-e-haqiqat chahiye
kasrat-e-fitrat mein wahdat ki aqidat chahiye

zabt-e-ehsasat ki aini shahadat chahiye
har amal mein tark-e-lazzat ki riayat chahiye

kasrat-e-fitrat mein rah kar husn-e-wahdat chahiye
har ibaadat mein ubudiyyat ki niyyat chahiye

jalwa-ha-e-nur ko aaghosh-e-KHalwat chahiye
aur KHalwat mein makin-e-dil ki jalwat chahiye

har-nafas aamada-e-azar hai charKH-e-kuhan
phir bhi insan ko kabhi aaram-o-rahat chahiye

be-sabaati mein bhi tama-e-zist daman-gir hai
har qadam par kuchh na kuchh ijad-o-jiddat chahiye

koshish-e-mashkur hain apni junun-afzaiyan
maktab-e-wahshat mein dastar-e-fazilat chahiye

hai kaThin qaid-e-badan mein did-e-anwar-e-KHafi
inhimak-e-dil ko zahir koi surat chahiye

hum ko is be-maegi par hi to 'sarwar' naz hai
bas faqat ahl-e-nazar ki kuchh inayat chahiye