Likh Rahi Hun Tumhein, Urdu Nazam By Shahnaz Nabi

likh rahi hun tumhein
apne dil ke sunahre warq pe abhi
dekhna tum ujalon ki yurish mein
kaise nikharti hun main
main ne mana ki guzre dinon ki tamazat mein jhulsa hai man
main ne mana hawas ke KHarajat mein mar gaya hai badan
shabnami raat ki aas mein aankhen banjar huin
chand ki raushni se hawason pe chhaale paDe
main ne suraj se aankhen churane ki koshish nahin ki kabhi
main ne apne lahu ko bacha kar rakha tha
likkhungi kisi din sunahre waraq pe wo ek ahmarin nam
jis ki chamak mere sare andheron ko zail karegi
likhungi hawaon ke aanchal pe tum ko
likhungi main indar-dhanush ki kaman par
likkhungi tumhein apne wahm-o-guman par
tumhein likh rahi hun main jharnon ki dhun par
tumhein likh rahi hun main chiDiyon ki gat par
mere aansuon ne meri ruh ko nam rakha hai abhi tak
tumhein likh rahi hun main un ankuron par
jinhon ne tumhein
ek chhitnar karne ka wada kiya hai