Mazdur, Urdu Nazam By Shahnaz Parveen Shazi

use kya farq paDta hai
december bit jaane se
yakum tariKH aane se
kisi bhi sal-e-nau ke KHair-maqdam par KHushi ke shadyane se
surur-o-kaif-o-masti mein mohabbat ke tarane se
club aur hoTalon mein wahshiyana raqs par saudaiyon ke thartharane se
use kya farq paDta hai
use to har guzarta sal ek jaisa hi lagta hai
wo ek mazdur he jis ki
musalsal bhuk aur iflas se arse se lambi jang jari hai
ki jis ke samne har subh pai-dar-pai mashaqqat ke taqaze hain
kaDi mehnat riyazat jehd-e-paiham us ka maslak hai
use kya farq paDta hai
calender par nae hindson ki ek tariKH aane se
december bit jaane se
naya ek sal aane se