Hassas, Urdu Nazam By Siraj Faisal Khan

aaKHir wo
kis ki ghalati thi
us buDhe ki
conductor ki
ya phir us bus ke driwer ki
jis ki bhi ho
lekin is mein
mera to koi dosh nahin tha
main to baqi
sab logon ki tarah
musafir tha us bas ka
jis ke niche
kahin achanak se
wo buDha aa jata hai
us ko
bus ke
niche aate bhi to na dekha tha main ne
wo to bus ke
brake se meri
nind khuli aur
shor samaat se Takraya
tab khiDki se jhanka tha main
idhar udhar
bikhri
sabzi ke
ird-gird
wo dhaar
lahu ki
sanp surekha
reng rahi thi
aur gale mein
shayad us ke
chiKH kahin par phansi hui thi
is manzar mein
seat se apni
hil tak na paya tha main to
hil kar bhi
ab hona kya tha
aaKHir main kar kya sakta tha
phir kyon
mujh ko
nind nahin aati us din se
khana khane
baiThta hun to
us buDhe ka
karbnak wo
lahu ugalne wala chehra
samne mere aa jata hai
aur phir
us ke ba'd
niwala
mere gale se
ulTi ban bahar aata hai
aur
mans ko
phaD ke
bahar nikli
us buDhe ki haDDi
mere dil mein dhans jati hain
kyon na-karda jurm ka ye ehsas mere andar baiTha hai
kya us ko main ne mara hai
us ki maut meri ghalati hai
thoDa bhi
hassas nahin hota hai koi
logon ko
ehsas nahin hota hai koi
mujh se sab
bas ye kahte hain
log to
marte hi rahte hain
kaun bhala parwa karta hai
tum hi
KHud ko qaid kiye ho us manzar mein
us manzar se
bahar aao
miTTi Dalo
dhuan uDao
lekin
main kaise
samjhaun
ki us ka
aaseb mere
KHwabon mein aa kar
roz yahi kahta rahta hai
mujh par ye ehsan karwa do
ghar par mere
biwi bachche
bhuke honge
un tak wo sabzi bhijwa do