Batla House By Aasim Badr

گھڑی کی ٹک ٹک بول رہی ہے رات کے شاید ایک بجے ہیں

بٹلہ ہاؤس کی ایک گلی میں موٹے کتے بھونک رہے ہیں

ایک کھنڈر میں تیز روشنی چاروں جانب پھیل رہی ہے

بغل میں لیٹا ساتھی میرا اب تک پب جی کھیل رہا ہے

میں بھی اب تک جاگ رہا ہوں آنکھیں موندے سوچ رہا ہوں

نیچے جانا کیسا ہوگا ۔۔۔ ؟ باہر کتنی سردی ہوگی ؟

قطب ستارہ کدھر کو ہوگا رات کی رانی کیسی ہوگی ؟

صبح کا سورج کہاں پہ ہوگا ۔۔۔۔ ابھی خدا کیا کرتا ہوگا ؟

سڑک کنارے سونے والے جوڑےکیسے سوتے ہونگے انکو مچھر کاٹتے ہونگے ؟

نوم چومسکی لان میں بیٹھے بچے آخر کیسے ہونگے انکو کتے چاٹتے ہونگے ؟

کیا ان بھوک زدہ بچوں کے خواب میں پریاں آتی ہونگی ؟

کٹے پھٹے ہاتھوں کے تکیے کے نیچے کچھ رکھتی ہونگی ؟

کیسی باتیں کرتے ہو جی کیا پریوں کا کام یہی ہے

محل سرائے چھوڑ کے اب وہ سڑک کنارے آئینگی کیا ؟

رات کے شاید ڈیڑھ بجے ہیں بٹلہ ہاؤس کا چوک کھلا ہے

رات کو جاب سے آنے والے رات میں جاب کو جانے والے

ایک ہاتھ میں لیے چائےکپ ایک ہاتھ میں چھوٹی سگرٹ

سڑک پار کیوں دیکھ رہے ہیں ؟

بریانی کو ڈھونڈھ رہے کیا ؟

انکے پیچھے سڑک کنارے قبرستان کا گیٹ کھلا ہے

اندر کتے گھوم رہے ہیں اندر کھانا ڈھونڈھ رہے کیا ؟

باہر سگرٹ اور کافی ہے اندر کافی تاریکی ہے

میں بھی اندر جھانک رہا ہوں ہولے ہولے سوچ رہا ہوں

قبرستان کے اندر میں یہ لیٹرین کس نے بنوایا

کیوں بنوایا

شاید رات میں مردے اٹھ کر اسکے اندر جاتے ہونگے حاجت پوری کرتے ہونگے

یا پھر سگرٹ پینے والے لڑکے اندر جاتے ہونگے

خاکی وردی گھر والوں سے چھپ کر سگرٹ پیتے ہونگے

ایک کنارے ادب کی ملکہ سب کچھ بیٹھی دیکھ رہی ہے

آگ کا دریا ، چاندنی بیگم ، شیشے کا گھر لکھنے والی

عینی آپا سوچ رہی ہے

میرا قاری کیوں آیا ہے

شاید اسکو گوتم ، شنکر ، طلعت نے الجھایا ہوگا

یا پھر اسکو خیابان کی چمپا نے پگلایا ہوگا

یا پھر اس پاگل لڑکے نے شعور کی رو کو چھیڑا ہوگا

یا پھر اس نے آگ کا دریا آدھا پڑھ کر چھوڑا ہوگا

فلسفیانہ باتیں سن کر سارے مردے سوچتے ہونگے

کوئی اپنی خواب گاہ کو چھوڑ کے آخر کیوں آیا ہے

میں بھی بیٹھا سوچ رہا ہوں

اتنی رات کو کیوں آیا ہوں ۔