Naat-e-rasool Sallallahu Alaihi Wasallam By Abdul Haleem Sikander

اس طرح بیدار اپنا بختِ خوابیدہ کریں

وجہِ خلقِ دوجہاں کا ہر گھڑی چرچا کریں

بیٹھتے اٹھتے زباں محوِ ثناء رکّھا کریں

ورد، صلّی اللہ کا ہر آن ہر لحظہ کریں

کیا ہی اچھا ہو اگر اک روز وہ ایسا کریں

طورِ دل پر اک تجلّی ڈال کر سرمہ کریں

جز تمہارے یا نبی! وہ کس کے پاۓ ناز ہیں؟

"تاجِ روح القدس کے موتی جسے سجدہ کریں"

فَاذکُرُونِی سے کریں سیراب گلشن زیست کا

اور پھر گلہاۓ اَذکُرکُم کی بو سونگھا کریں

قلزمِ عشقِ شہِ دیں کے حسیں گرداب میں

کشتیِ فکر و سخن لے کر گہر ڈھونڈا کریں

خود خداۓ مصطفی فرماۓ جب" لا تقنطوا"

پھر غلامان نبی کس بات کی چنتا کریں

جن کے ہاتھوں میں کلیدِ مخزنِ کونین ہے

سادگی دیکھو ذرا فاقے پہ وہ فاقہ کریں

وصل کی شب آپ اس حد سے بھی آگے چل دیے

عذرِ سوزِ پر جہاں پر طائرِ سدرہ کریں

جن کے صدقے سب ملا ان سے تو کر بیٹھے دغا

نجدیو! ہم اب بھی تم سے خیر کی آشا کریں؟

جاں نثارانِ محمّد ﷺ رہ نوردِ خلد ہوں

اور گستاخاں بہ دزدیدہ نظر دیکھا کریں

ہم نہ کہتے تھے؟کہ ان کے بغض میں نقصان ہے

جا رہے ہو آج سوۓ نار تو ہم کیا کریں

ہر طرف ہے حشر برپا ہر کوئی بے چین ہے

ایسے عالم میں بھلا ہم لب کہاں پر ،وا، کریں

آپ ہی سے لو لگی ہے آپ اگر منہ پھیر لیں

پھر کہاں فریاد ہم اے والئِی بطحا کریں

اک کرونا وائرس کی ہے بھلا اوقات کیا

دور ہوں ساری بلائیں وہ جو اک ایما کریں

آپ اک پل کے لئے تشریف لے آئیں حضور

مدّتوں پھر میرے گھر کے بام و در مہکا کریں

ہم کو بھی مل جائے اذنِ حاضریِّ بارگاہ

ہم بھی آکر گنبدِ خضریٰ کا نظّارہ کریں

رفتہ رفتہ ختم ہو جائیں گے ایّامِ فراق

حضرتِ دل! صبر رکھیں یوں نہ گھبرایا کریں

آسرا ان کی شفاعت کا ہمیں ہے روز حشر

ہم نہیں وہ مورکھ جو اعمال پر تکیہ کریں

چاہتے ہیں جو سکندر آپ لطفِ شاعری

سیّدِ عالم کی نعتیں با وضو لکّھا کریں