Main Karachi Hun Suno Ahl E Jahan Ahl E Watan By AbdulHaseebsani

ہزار زخم سے گھائل شدہ ہے میرا بدن

میں کراچی ہوں سنو اہل جہاں اہل وطن

میں کسی دور میں روشن تھا ستاروں کی طرح

میرا وجود تھا گلشن میں بہاروں کی طرح

کبھی پھولوں سے مہکتا ہوا تھا میرا بطن

میں کراچی ہوں سنو اہل جہاں اہل وطن

میں کسی دور دار امن اور حکومت تھا

شرح نمو معیشت میں میری صورت تھا

بھلا دئیے ہیں سب نے آج مگر میرے جتن

میں کراچی ہوں سنو اہل جہاں اہل وطن

مہاجروں کو بھی آتے ہوئے دیکھا میں نے

پڑھی قربانیوں کی ان کی بھی لیکھا میں نے

دی گئی اردو مجھے پھر برائے ادب و سخن

میں کراچی ہوں سنو اہل جہاں اہل وطن

چاروں صوبوں لوگ آنے لگے میری طرف

میں نے ان کو بھی بسایا تھا میرا اعلیٰ ظرف

ہر ایک قوم کے لوگوں کا بنا میں مسکن

میں کراچی ہوں سنو اہل جہاں اہل وطن

میرے چمن کو لگی پھر کسی حاسد کی نظر

ہزاروں گولیوں سے چھلنی ہوا میرا جگر

لسانیت سے روند ڈالا گیا میرا امن

میں کراچی ہوں سنو اہل جہاں اہل وطن

ہزار سازشیں کرنے لگے پھر میرے خلاف

وہی یزید جلاتے ہیں جو کعبے کا غلاف

کوٹہ سسٹم سے وہ دبانے لگے میرا دہن

میں کراچی ہوں سنو اہل جہاں اہل وطن

میرے لوگوں سے اب یہ کہتے ہیں غدار ہو تم

ہاں یہ غدار ہیں بس ایک وفادار ہو تم

یہ ظلم کب تلک پھوٹے گی کبھی حق کی کرن

میں کراچی ہوں سنو اہل جہاں اہل وطن

میرے مکینوں سے بھی ہے ایک شکایت مجھ کو

لسانی عصبیت سے کرتے ہیں غارت مجھ کو

بھلا یہی ہے زمانے میں پنپنے کا چلن؟

میں کراچی ہوں سنو اہل جہاں اہل وطن

نفرتوں کے مزید مارو نہ پتھر مجھ کو

اخوتوں سے کرو مل کے معطر مجھ کو

اپنے دامن سے کرو دور نفرتوں کی شکن

میں کراچی ہوں سنو اہل جہاں اہل وطن

تم بھی اب معاف کرو اہل اختیار مجھے

تمھاری نیک تمنا بھی ہے درکار مجھے

میرے وجود میں ہو پھر سے ترقی کا جشن

میں کراچی ہوں سنو اہل جہاں اہل وطن