Nazm - Nia Sal By Farrukh Hummayoun

نیا سال

اِس دِسمبرکی آخری شب ہے

اور چـڑھا چاہتا ہے سـال نِیا

واٹس ایپ، فیس بُک، ٹویٹر پر، دوستوں نے لِکھے جو حرفِ دُعا

اِک نئی رسـم اِک رواج نیا، دِل کو بھایا، بڑا ہی اچھا لگا

ڈھل گئی پِھر یہ آخری شَب بھی

جشــنِ نـو روز بھـی تمـام ہوا

۔۔۔۔۔۔۔۔۔۔۔۔۔۔ سَج کے نِکلا برس کا دِن پِہلا

۔۔۔۔۔۔۔۔۔۔۔۔۔۔ سالِ نـو شان سے طُلوع ہوا

نیا سورج، نئےہیں شام و سحر، کیوں نجانے مُجھے لگا یہ مگر

سـارے مَنظـر وہی پُـرانے ہیں، دیکھتا ہوں جِدھر اُٹھا کے نظر

وہی رستہ، وہی سفر، وہی گھر

جوں کی توں اپنی زندگی کی ڈگر

۔۔۔۔۔۔۔۔۔۔۔۔۔۔ پیش منظرمیں کُچھ دِکھائی دیا

۔۔۔۔۔۔۔۔۔۔۔۔۔۔۔ دُور حدِ نظر تلک پھیلا

ایک بے نظم و ضبط و ربط ھُجوم، بچوں بوڑھوں کِا نوجوانوں کا

سب کے سب اِنمیں عاجِز و لاچار طـوقِ پہنے ہوئے غُلاموں کا

اندھوں گونگوں کا بے زُبانوں کا

بوجـھ لادے ہوئے، زمـانوں کا

۔۔۔۔۔۔۔۔۔۔۔۔۔۔۔۔ ریگِ صِحرا پہ سر پٹختا ہوا

۔۔۔۔۔۔۔۔۔۔۔۔۔۔۔۔ ایک جَمِ غَـفـیر، اِک ریلا

قیـد مجبوریوں کے زنداں میں، لیتھڑوں میں بدن چُھپائے ہوئے

بھوک، افلاس کےستائے ہوئے، کاسہ لٹکائے سَر جُھکائے ہوئے

جھولی پھیلائے، ہاتھ اُٹھائے ہوئے

زندگانی سے تنگ آئے ہوئے

خوف سے کانپتے گھبرائے ہوئے

۔۔۔۔۔۔۔۔۔۔۔۔۔۔۔ ڈر رہے ہیں کہ آگے کِیا ہو گا ؟

۔۔۔۔۔۔۔۔۔۔۔۔۔۔۔ سالِ نؤ اِنکے لئے لائے گا کیا ؟

سالِ نـو شان سے طُلوع ہوا

سوچتا ہوں کہ اِسمیں کِیا ہے نیا؟

(فرخ ھمایوں۔ ۳۱ دسمبر ۲۰۱۷)