Phir Sham Hui By Khawaja Imtiaz Kavish

پھر شام ہوئی، دل ڈوبا ہے

آغوش میں اپنی لے کر کے اک عمر کا وعدہ ٹوٹا ہے

جو جان نچھاور کرنی تھی

جو گلیوں خون بہانا تھا

جو آنسو جان کے کاغذ پر شبنم بن کر چھلکانا تھا

وہ جان کہی ہم کھو بیٹھے

وہ خون رگوں میں جم آیا

وہ آنسو آنکھ میں پتھر بن اک صبر ہوا اک ضبط ہوا

یہ جسم کہ اب تھک ہار گیا

بیمار ہوا، بیمار گیا

یہ جسم کہ اک برفیلی رُت میں آگ کا شعلہ ہوتا تھا

یہ جسم کہ اک تاریک زماں میں تاک میں روشن تارا تھا

یہ جسم کہ اک بیزار چمن میں کلیاں، گل مہکاتا تھا

پر اب کچھ ایسا ہے پیارے

وہ جسم نہیں وہ جان نہیں

رونے کا بھی امکان نہیں

یہ جسم سہارے کھو بیٹھا

یہ جان کنارے آئی ہے

دن روشن ہے اور اس دن میں

بس تاریکی چھائی ہے

پھر شام ہوئی تو سوچا ہے

ان خوابوں کو گلزاروں کو

ان لوگوں کو ان یاروں کو

وہ خواب کہ اپنی تعبیریں ہنستے ہنستے بتلاتے تھے

وہ خواب کہ جگمگ جگمگ تھے

ان آنکھوں میں ان اشکوں میں

وہ جن سے ہم نے ان آنکھوں کو خواب دکھائے تھے دن میں

ان لوگوں کا ان یاروں کا کیا کہنا ہے کیا لکھنا ہے

وہ لوگ تو اب ہم کھو بیٹھے

وہ یار پرائے ہو بیٹھے

وہ خواب کہ سارے ٹوٹ گئے

وہ دوست پرانے چھوٹ گئے

پھر شام ہوئی تو یاد آئے

وہ لوگ بہت وہ یار بہت

وہ آنکھوں کے گلزار بہت

وہ اپنے ہی غمخوار بہت

اے شام ذرا تو ان سے کہہ

تم یاد بلا کے آتے ہو

اس تنہائی کے میلے میں

کچھ گیت انوکھے گاتے ہو

ہم کیسے اپنی بات کہیں

تم دور بہت ہو پاس نہیں

بیمار ہے دل بیمار ہیں ہم

اور ایسے میں کچھ آس نہیں