Nazam: Nanhay Bachay Ka Sar By Wasim Khan Abid

اِک سردیوں کی صبح۔۔میں۔۔۔

نکل کے گھر سے چل پڑا

ہر ایک بوند سرد تھی

ہر ایک اوس برف تھی

جہاں پہ دُھند کا دھواں

تھا نصف شب سے چھا گیا

گزر تھا ,ایک راہ سے

جہاں پہ ڈھیر تھا بنا

غلاظتوں بھرا ہوا ،سڑاند سے اٹا ہوا

کہ شہر کی عفونتیں تھی مجتمع۔۔۔

مگر وہا ں ہجوم تھا ،ہر ایک لب پہ آہ تھی

ہر ایک دلگداز تھا۔۔

ہر آنکھ اشکبار تھی،ہاں درد کا شکار تھی

ہجوم چیرتا ہوا،میں پاس جا کھڑا ہوا ،

جو دیکھا ڈھیر کی طرف وہاں پہ ایک لاش تھی

وہ لاش تھی ،یاسرتھا وہ؟

ہاں سر تھاوہ!۔۔۔۔

کہ ننھےپیارے پھول کا۔۔۔ہی سر تھا وہ

کہ ہاتھ پیر کاٹ کر سگانِ شہرکھا چکےتھےرات کو

کہ سرتھا وہ۔۔۔جو جسم سے جُدا ہوا۔۔۔۔

وہ ماں کی لاج رکھ گیا۔۔۔۔جو بہہ گئی تھی عشق میں

محبتوں کی لہر میں۔۔۔۔ رفاقتوں کے بحر میں!

کہ چاہتوں کے سحر۔۔۔!

یا جبر کا شکار تھی؟۔۔۔۔یا تر نوالاتھی کوئی۔۔؟

جو راز پہ نثار تھی۔۔۔!

ہاں سر تھا وہ!۔۔۔جو نیلے نیلےہونٹ تھے

جمے ہوئے لہوکےچھوٹے چھوٹے پیارےلوتھڑے

ہنسی سے نابلد ابھی ۔۔۔وہ ہونٹ تھے۔۔

معاشرے پہ طنز سے ۔۔۔وہ کیا ہنسیں۔۔؟

وہ آنکھ جو نہ وا ہوئی۔۔۔۔بھرم تو رکھ گئی تھی ہاں۔۔۔

معاشرے کے طعن سے ۔۔۔۔بچاچکی تھی باپ کو۔۔۔!

ہاں۔۔۔۔۔۔ سر تھا وہ۔۔۔۔!

وہ ایک لمحہ پیار کے۔۔۔ وصال کاکمال تھا!

وہ عشق کا جنون بھی تھا

ملن کا وہ جمال تھا

وہ ڈھیر پر پڑا ہوا ۔۔۔گلاب تھا

وہ پھول تھا۔۔یا سر تھا وہ۔۔۔۔۔۔

یا ۔۔۔عشق کا مزار تھا۔۔۔۔۔۔۔۔۔۔۔۔۔۔۔۔۔؟؟؟

وسیم خان عابدؔ