سرحد چیمبر آف کامرس اینڈانڈسٹری کا حکومت کی جانب سے افغان درآمد شدہ اشیاء کی کسٹمز ڈیوٹی اور ویلیو کی کمی کے فیصلہ کا خیر مقدم

پشاور(اُردو پوائنٹ اخبارتازہ ترین - آن لائن۔ 01 جنوری2021ء) سرحد چیمبر آف کامرس اینڈانڈسٹری نے حکومت کی جانب سے افغان درآمد شدہ اشیاء کی کسٹمز ڈیوٹی اور ویلیو کی کمی کے فیصلہ کا خیر مقدم کیا ہے اور اس اقدام سے پاک افغان باہمی تجارت فروغ حاصل ہوگا اور دونوں ہمسایہ ممالک کے درمیان تجارتی و کاروباری سرگرمیوں میں بھی نمایاں تیزی آئے گی ۔ ایک مشترکہ بیان میں سرحد چیمبر کے صدر شیر باز بلور ‘ سینئر نائب صد ر انجینئر منظور الٰہی اور نائب صدر جنید الطاف نے کہاکہ پاک افغان باہمی تجارتی حجم میں اضافہ کی گافی گنجائش موجود ہے تاہم انہوں نے حکومت پاکستان اور افغانستان پر زور دیا ہے کہ دونوں ممالک باہمی تجارتی حجم کو مزید بڑھانے کے لئے سنجیدہ کوششیں اور اقدامات کرے ۔

انہوں نے کسٹمز اتھارٹیز کی جانب سے جاری کردہ ایک اعلامیہ کا حوالہ دیتے ہوئے کہا کہ اعلامیہ کے مطابق افغان درآمد شدہ مصنوعات و اشیاء پر کسٹمز ڈیوٹی اور ویلیو میں کمی کے احکامات جاری کئے گئے جو کہ حکومت کی جانب سے ایک خوش آئند اقدام ہے ۔

(جاری ہے)

انہوں نے کلکٹریٹ کسٹمز آپریزمنٹ اینڈ فیسیلی ٹیشن کے کردار کو سراہتے ہوئے کہا کہ کلکٹر کسٹمزآپریزمنٹ پشاور محمد سلیم کی خصوصی دلچسپی کی وجہ سے پاک افغان باہمی تجارت کو فروغ دینے میں آسانیاں پیدا کی جا رہی ہیں ۔

انہوں نے امید ظاہر کی کہ حکومتی پالیسیوں کے نتیجے میں پاک افغان تجارتی و اقتصادی اور کاروباری سرگرمیوں میں تیزی آئے گی اور دونوں ہمسایہ ممالک کے درمیان باہمی تجارتی حجم کو بڑھانے میں کافی مددگار ثابت ہوگی۔انہوں نے افغانستان کی حکومت پر بھی زور دیا ہے کہ پاکستان سے ایکسپورٹ ہونیوالی اشیاء پر بھی ریگولیٹری ڈیوٹیزاورٹیکسز کی شرح میں بھی کمی لائی جائے ۔

انہوں نے کہا کہ پاکستان اور افغانستان کے درمیان باہمی تجارتی حجم بہت کم ہے جس کو بڑھانے کی اشد ضرورت ہے اس ضمن میں اسلام آباد اور کابل کو پاک افغان تجارت کی راہ میں حائل رکاوٹوں کودور کرنے کیلئے اپنا کردار ادا کرنا چاہئے۔ انہوں نے مزید کہاکہ پاکستان اور افغانستان کے درمیان تجارتی و کاروباری سرگرمیوں میں تیزی آنے سے ملکی معیشت مزید مستحکم ہوگی اور ملکی ریونیو میں بھی اضافہ ہوگا ۔

انہوں نے کہا کہ پاک افغان تجات میں بہتری و تیزی کے نتیجے میں پاکستانی مصنوعات ۹کی وسطی ایشیاء کے ممالک میں ایکسپورٹ میں بھی اضافہ ہوگا ۔ انہوں نے حکومت سے مطالبہ کیا کہ پاک افغان تجارت کو بڑھانے کے لئے پالیسیوں پر نظرثانی کی جائے اور افغان ٹرانزٹ ٹریڈ کے نئے معاہدہ سمیت تجارت سے متعلق پالیسیوں سمیت متعلقہ دیگر اقدامات بارے میں سرحد چیمبر اور بزنس کمیونٹی سے باہمی مشاورت کے بعد حتمی شکل دی جائے تاکہ ان پالیسیوں کے مثبت نتائج سامنے آسکیں۔