تیر و ترکش

#26 مارچ، پیپلزپارٹی کے سید یوسف رضا گیلانی سینیٹ میں اپوزیشن لیڈر مقرر۔
پہلے لانگ مارچ، پھر مریم نواز کی نیب میں پیشی ملتوی، پھر بھی 26مارچ کی حشرسامانیاں کم نہ ہوسکیں۔
#پنجاب میں تحریک عدم اعتماد لا سکتے ہیں، قمرزمان کائرہ
کائرہ صاحب بھی ناں بس آپا فردوس بنتے جارہے ہیں۔

#عید کے بعد تازہ دم ہوکر اسلام آباد کا رخ کریں گے، مولانا فضل الرحمن
پھر بڑی عید اور محرم کے نام پر اگلی تاریخ دے کر چلے جائیں گے۔
#امریکی سفیر کی حمزہ شہبازشریف سے ملاقات پر حیرت ہوئی، وفاقی وزیر برائے بحری امور علی زیدی
ڈریں اس وقت سے جب ایسی ملاقاتیں آپ کے لیے پریشانی کا سبب ہوں گی۔

(جاری ہے)

# آصف زرداری اور نوازشریف سے بات کرکے مولانا فضل الرحمن درمیانی راستہ نکالنا چاہتے ہیں، رانا ثناء اللہ
شاعر نے کہا تھا #
#بلاول کا بیان، ن لیگ مولانا فضل الرحمن کوصورت حال سے آگاہ کرے گی۔
 یعنی اب ن لیگ مولانا کو آگاہی دے گی!
#پی ڈی ایم کے حوالے سے تلخ تبصروں سے گریز کریں، بلاول کی پی پی پی راہنماوٴں کو ہدایت
کیونکہ اب اقدام کا وقت ہے۔

#اسلام آباد ہائی کورٹ، گیلانی کی درخواست مسترد، سنجرانی چیئرمین سینیٹ برقرار۔
اس کے ساتھ یہ خبر ملاکر پڑھیں، زرداری فضل الرحمن رابطہ، معاملات مل کر حل کرنے پر اتفاق۔
#چیئرمین ایچ ای سی طارق بنوری کو تبدیل کرنے کا فیصلہ، چیئرمین کی مدت چار سے کم کرکے دو برس کردی جائے گی، آرڈیننس کی منظوری
اور وزیراعظم کے لیے پانچ برس کی مدت بھی کم ہے بقول کپتان۔

#بلاول بھٹو زرداری کا مولانا فضل الرحمن اور ایمل ولی خان سے ٹیلی فونک رابطہ، مولانا سے ان کی اور ایمل ولی سے اسفندیار ولی کی خیریت دریافت کی۔
پنجابی میں کہتے ہیں: ہن آرام اے
#لوٹوں اور نوٹوں نے سیاسی نظام بوسیدہ کردیا، سراج الحق
 اور یہ محض ایک اتفاق ہے کہ لالہ کے اس بیان کی اشاعت کے دن جماعت کے سینیٹر مشتاق احمد کی حمایت سے گیلانی سینیٹ میں قائد حزب اختلاف بن گئے۔

#تمام صوبوں میں بلدیاتی نظام بحال کیا جائے، مصطفی کمال
کیا حسن طلب ہے!
#کورونا وبا میں پاکستان کی پالیسیاں بہتر رہیں، آئی ایم ایف
آپ کی نظر میں!
#سوال یہ ہے کہ ڈسکہ میں پولنگ کے دن کون اور کیوں مسائل پیدا کرتا رہا، سپریم کورٹ کا سوال
اتنے طاقتور سوال کا جواب کون دے سکتا ہے جناب!
#ادارے بلائیں تو جلوس لے کر جانا ناقابل قبول، وزیراعظم
ہاں! نہ بلائیں تو پھر جلوس لے کر اداروں پر چڑھائی بھی کرسکتے ہیں اور دھرنا وغیرہ بھی دے سکتے ہیں۔

#نیب نے کورونا صورت حال کے باعث مریم نواز کی پیشی ملتوی کردی، نئی تاریخ کا اعلان مناسب وقت پر کیا جائے گا۔
واہ کورونا تیرے کرشمے!
#بیگم صفدر نے ضمانت کرواکر بزدلی کا ثبوت دیا، فیاض الحسن چوہان
اور نیب نے پیشی ملتوی کرکے غالباً ”حکمت“ وغیرہ کا ثبوت دیا ہے ناں!
#طے ہوچکا سینیٹ میں اپوزیشن لیڈر ن لیگ کا ہوگا، پی پی فیصلوں کا احترام کرے، مولانا فضل الرحمن کا آصف زرداری سے ٹیلی فونک رابطہ
اس فون کے اگلے دن پی پی نے اس طے شدہ فیصلے کو تہہ کرکے گیلانی کو سینیٹ میں قائد حزب اختلاف بنوالیا، کر لو جو کرنا ہے۔

#پولیس میں کالی بھیڑیں ہیں، آئی جی سندھ مستعفی ہوں، حلیم عادل شیخ
سیاست کی کالی بھیڑوں کی وجہ سے بھلا کسے مستعفی ہونا چاہیے۔
#مریم کی پیشی ملتوی کرنے کا جواب نیب ہی دے سکتا ہے، شبلی فراز
لگتا ہے کسی نے نیب کو بھی جواب ہی دے دیا ہے اس معاملے میں۔