چیف آف آرمی سٹاف کی زیر صدارت 210ویں کور کمانڈر کانفرنس

ملک کی جغرافیائی و تذویراتی اور سیکیورٹی صورتحال کا جائزہ لیا گیا، آپریشن رد الفساد پر پیشرفت، خوشحال بلوچستان پروگرام پر بھی تبادلہ خیال امن کے ثمرات فاٹا کو عوامی امنگوں کے مطابق قومی دھارے میں شامل کرنے سے جڑے ہیں، جنرل قمر جاوید باجوہ دہشت گردوں سے پاک علاقے سول انتظامیہ کے حوالے کئے جارہے ہیں،پاک فوج ملکی امن وخوشحالی کیلئے قومی اداروں کا بھرپور ساتھ دیتی رہے گی، آرمی چیف کا کانفرنس سے خطاب

بدھ 11 اپریل 2018 22:19

راولپنڈی (اُردو پوائنٹ اخبار آن لائن۔ بدھ 11 اپریل 2018ء) چیف آف آرمی سٹاف جنرل قمر جاوید باجوہ نے کہا ہے کہ امن کے ثمرات فاٹا کو عوامی امنگوں کے مطابق قومی دھارے میں شامل کرنے سے جڑے ہیں،دہشت گردوں سے پاک علاقے سول انتظامیہ کے حوالے کئے جارہے ہیں،پاک فوج ملکی امن وخوشحالی کیلئے قومی اداروں کا بھرپور ساتھ دیتی رہے گی۔

آئی ایس پی آر کے مطابق 210 ویں کور کمانڈرز کانفرنس چیف آف آرمی سٹاف جنرل قمر جاوید باجوہ کی زیر صدارت جنرل ہیڈ کوارٹرز (جی ایچ کیو) راولپنڈی میں ہوئی۔کانفرنس میں ملک کی جغرافیائی و تذویراتی اور سیکیورٹی صورتحال کا جائزہ لیا گیا جبکہ آپریشن ردالفساد پر پیش رفت اور خوشحال بلوچستان پروگرام پر بھی تبادلہ خیال کیا گیا۔

(جاری ہے)

اجلاس میں ملک میں سیکیورٹی استحکام لانے میں تمام قومی اسٹیک ہولڈرز کے کردار اور دہشت گردی مسترد کرنے میں بالخصوص پرعزم پاکستانیوں کی قربانیوں کا اعتراف کیا گیا۔

اجلاس میں دیر پا امن کیلئے ریاستی اداروں سے تعاون جاری رکھنے کے عزم کا بھی اظہار کیا گیا ۔اس موقع پر چیف آف آرمی سٹاف جنر ل قمر جاوید باجوہ نے کہا کہ امن و خوشحالی کے ثمرات عام آدمی تک پہنچنے چاہئیں، دہشت گردوں سے پاک علاقے سول انتظامیہ کے حوالے کئے جارہے ہیں۔انہوں نے کہا کہ امن کے ثمرات فاٹا کو عوامی امنگوں کے مطابق قومی دھارے میں شامل کرنے سے جڑے ہیں جبکہ پاک فوج ملکی امن وخوشحالی کیلئے قومی اداروں کا بھرپور ساتھ دیتی رہے گی۔