امریکا چین کی نفرت کا غصہ پاکستان پر نکال رہا ہے، نگراں وزیرخارجہ

ہمیں حالیہ نہج تک پہنچانے کا تمام تر ذمہ دار امریکا ہے، نگراں وزیرخار

جمعہ 3 اگست 2018 23:12

حیدرآباد(اُردو پوائنٹ اخبار آن لائن۔ جمعہ 3 اگست 2018ء)نگراں وزیرِ خارجہ عبداللہ حسین ہارون نے کہا ہے کہ چین سے قرض لینے پر امریکا برا مان گیا اور اب چین کا غصہ ہم پر نکال رہا ہے۔ حیدرآباد میں میڈیا سے بات کرتے ہوئے نگراں وزیرِ خارجہ کا کہنا تھا کہ سابق حکومت جاتے جاتے دو سو ارب روپے کے چیک پر دستخط کرکے گئی لیکن ہمیں کچھ نہیں ملا، پاکستان آئی ایم ایف سے 12 ارب ڈالر مانگ رہا ہے جس میں سے 50 فیصد رقم سے آئی ایم ایف کا قرض اتارنا ہے۔

نگراں وزیر خارجہ کا کہنا تھا کہ آئی ایم ایف سے مانگے جانے والی رقم کا چین سے کوئی تعلق نہیں ہے، چین سے پیسہ لینے پر امریکا برا مان گیا، امریکا کے پاس پاکستان کو دینے کے لئے پیسے نہیں اوربھارت کو 9 ارب ڈالر جنگی اخراجات کے لئے جاری کردیئے، امریکا چین کا غصہ ہم پر نکال رہا ہے۔

(جاری ہے)

عبداللہ حسین ہارون نے کہا کہ پاکستان کو جنہوں نے کئی برس استعمال کیا ان کے اس رویئے سے تکلیف ہوتی ہے، جان و مال کی قربانی کے باوجود دوست کہنے میں فخر محسوس کرنے والے نظر انداز کر رہے ہیں، ہم نے امریکا کی لڑائی میں اپنی دو تین نسلیں قربان کیں اور آج ہمارے ساتھ یہ سلوک اپنایا جا رہا ہے، ضیائ دور میں روس سے جھگڑا کروا دیا اور لاکھوں افغان مہاجرین کو پاکستان رہنے کی اجازت دی، ہمیں اس نہج تک پہنچانے کا تمام تر ذمہ دار امریکا ہے۔