Na Teri Yaad Na Wo Lutf-e-ah-e-nim-shabi, Urdu Ghazal By Ali Minai

na teri yaad na wo lutf-e-ah-e-nim-shabi
dil-o-dimagh hue waqf-e-ranj-e-be-sababi

tere karam ne kiya ye bhi ek sitam hum par
ki chashm-e-shauq ne sikhi na mudda-talabi

gham-e-nashat ke maron ko kaun samjhae
KHumar-e-mai se hai baDh kar surur-e-tishna-labi

wo KHana-zad-e-bahaaran hai us ko zeba hai
gulab-pairahani gul-ruKHi-o-ghuncha-labi

hawas mein ek suKHan raegan ki wo bhi gaya
mataa-e-ghuncha tha jo iztirab-e-jaan ba-labi

koi nazar nahin shaista-e-suKHan warna
wahi hai chashm-e-fusun-gar ki guftugu-talabi

mera wajud sahi ek musht-e-KHak magar
hai zarre zarre mein elan-e-kahkashan-nasabi

KHirad hijab-e-haqiqat uTha to de lekin
abhi junun ko gawara nahin ye be-adabi

hawa-e-zar se hua kam na habs-e-jaan hargiz
miTi na aab-e-guhar se kisi ki tishna-labi

yaqin to kya mere wahm-o-guman laraz uTThe
nigar-KHana-e-fitrat mein thi wo bul-ajabi

nigah-e-yar thi mail-ba-dar-guzar lekin
hamin rahe na adab-ashna-e-be-adabi

tamam shahar pe baiThi hai is ke ilm ki dhak
ki bolta hai wo urdu ba-lahja-e-arabi

KHuda ka fazl hai aur faiz-e-saqi-e-shiraaz
ki mere sher mein hai kaif-e-baada-e-inabi