Lamha, Urdu Nazam By Atif Tauqeer

ek sulgi hui si dhaDkan par
kapkapate larazte honTon se
jism bhar par huruf ugte hain
KHamushi ko zaban milti hai
lau pighal kar badan mein ghulti hai
ruh mein aks ugne lagte hain
aaine par sarab chalte hain
qatra qatra pighalte jazbon par
rafta rafta phuwar paDhti hai
waqt ki nabz tez chalti hai
har gunah-o-sawab se aage

aayat-e-be-KHudi ki sarhad par
barf se bhap tak ke raste par
qurb-e-tahliliyat ki manzil par
wasl-e-malumiyat ke hasil par
ek lamha Thahar sa jata hai
zindagi sirf ek lamha hai