Tashaddud, Urdu Nazam By Balraj Komal

us kamre ki tartib se
main manus tha
us ki har shai se
patthar se diwaron se
chhoTi chhoTi chizon aur kitabon se
mutarannim aawazon se
shor machate hanste-gate
gahe-gahe lamha-bhar ko
chup ho jate
apne apne aasman se
tanhai mein
sukh aur dukh ki baaten karte logon se
nannhi-munni sargoshi mein jadu bharti
guDiya se
rang luTate us ke naT-khaT guDDe se
tum to mere apne the
tum ne ye kya kar Dala
tum ne apne hath se
meri barson ki manus lakiren
darham-barham kar Dalen
aawazon ki ragniyon ki taswiron ki
raushan aankhen
tum to mere apne the
tum ne ye kya kar Dala