Raat Ka AaKHiri Pahar, Urdu Nazam By Beena Goindi

raat ka aaKHiri pahar bhi
raKHt-e-safar bandh raha hai
mere kamre mein KHamoshi aur tariki
do buDhi saheliyon ki tarah ek dusre mein gum hain
main hath mein garm chae ki pyali liye
soch rahi hun ki mujhe kya sochna chahiye
kya use
jo mera kuchh bhi nahin
to phir use kya sochna
chalo apne mustaqbil ke raushan KHwab
aankhon mein zinda karte hain
magar KHwab
kya un ki tabir waqai raushan hogi
kise KHabar hai
achanak kaise murghe ki aawaz aai
aur mujhe yun laga jaise
us ne dur se kisi ko pukara ho
pukar
main ne aisa kyon socha
kya mere sine mein bhi koi pukar dafn hai
nahin chhoDo
aur phir bahut se murghe chillane lage
jaise kisi bichhDe hue ka matam kar rahe hon
uf phir kya KHayal aaya
main un ki aawazon ko wasl ka git bhi to kah sakti thi
mujhe ye aawazen nauha kyon lagin
kya mere andar bhi kisi se bichhaDne ka gham pinhan hai
nahin to
mujhe kisi se bichhaDne ka gham kyon kar hua
are
koi kutta bhaunka
main ne khiDki se bahar jhanka
andhera dur tak
aur andhere se mujhe phir kuchh yaad aaya
andhera andhera
wo bhi to apne mahaul ko
andhera kaha karta hai nan
wo wo
lekin nahin
mujhe use nahin sochna
to phir
soch rahi hun ki mujhe kya sochna chahiye