Parveen Sultana Ke Liay Aik Nazm, Urdu Nazam By Kausar Mahmood

تمہیں کس نے کہا

بزمِ سخن اصحابِ دل سے خالی ہوتی جا رہی ہے

ادھر دیکھو!

یہاں! وارفتگی میں مسندِ ارشاد سے نیچے اُتر کر کون آیا ہے

محمد خالد آیا ہے

جلوے خاص میں جس کے

علی زریون ہے، اختر علی، عماد اظہر ہے

شناور بھی ہے بابر بھی ہے اور ناچیز کوثر بھی

نہ جانے اور کتنے چاہنے والے،

سراپا عجز بن کر گوش بر آواز بیٹھے ہیں

چلو پروین سلطانہ شڑج قائم کرو

ازل کی وسعتوں میں یہ طلسم اندر طلسم آواز

جیسے نورِ اولیٰ....

لامکاں کی سرحدوں کے پار، ہر لحظہ فزوں تر ضو فشانی میں

رچاﺅ غیر فانی ہے تمہاری سُر کہانی میں

سلیقہ رس میں ڈھلتا ہے تمہاری ترجمانی میں

تمہارے سُر کی پہنائی

کسی بھی حدِّ امکاں سے ورا کی وسعتوں سے آشنائی دے

تمہاری آخری سپتک پہ سرگم، نغمۂ داﺅد کا پرتَو دکھائی دے

تمہارے اِرتفاعِ خاص کو تسلیم کرنا آج کا دستور ٹھہرا ہے

کہ تم سُرتال کے دربار میں کتنی سہولت سے حکومت کر رہی ہو

جبکہ واں تختِ سلیماں آخری صف میں کھڑے لوگوں کے پاﺅں چُوم کر مسرور ٹھہرا ہے

تمہیں تعظیم دینا آج کا دستور ٹھہرا ہے

چلو پروین سلطانہ شڑج قائم کرو!