Bas Yahi To Muddaa Hai Aap Ke Irshad Ka, Urdu Ghazal By Murli Dhar Shad

bas yahi to muddaa hai aap ke irshad ka
'shad' kis ne nam rakkha aashiq-e-nashad ka

lijiye hazir hai nazrana dil-e-nashad ka
Talna aasan na tha kuchh aap ke irshad ka

barq samjha hai jise sara zamana dekhiye
aasman par chaDh gaya lachha meri fariyaad ka

hashr se ishq-e-nihan ki aur shohrat ho gai
ek aalam qissa-KHwan nikla meri rudad ka

be-talluq ho ke rahna bagh-e-alam mein muhaal
pa-ba-gul hona to dekho sarw se aazad ka

baghban sayyaad gulchin sab ke sab dekha kiye
aashiyan ujDa kiya ek KHanaman-barbaad ka

tark-e-ulfat par jo main zinda raha ghabra gae
DhunDte hain ab naya pahlu koi bedad ka

zikr-e-dushman par mujhe jhuTlane wale phir tu kah
tum ho muztar kya bharosa hai tumhaari yaad ka

garmi-e-dagh-e-jigar se mom ho kar bah gaya
tum usi KHanjar ko samjhe the ki hai faulad ka

aankh se kuchh ho ishaara kuchh tabassum lab pe ho
'shad' karna kuchh nahin mushkil dil-e-nashad ka

teri sab sunte hain meri koi sunta hi nahin
kis se roun ja ke ab dukhDa teri bedad ka

'shad' yakta-e-jahan hai aap ke sar ki qasam
dekh lena ja-nashin hoga yahi ustad ka