Use Kahna December Aaya Hai, Urdu Nazam By Riyaz Tauheedi

use kahna december aaya hai
KHizan ne bahaar ki KHub-surati ko
chinar ke zard patton mein dafn kar diya hai
in patton ki jawani ab buDhape ki siskiyon
mein ro rahi hai
ab ye rona bhi rafta rafta dam toD dega
aur apne mashuq ki be-bas Tahniyon se
judai ka karb sahte sahte
ye sukhe patte KHak-nashin ho jaenge
phir kaun inhen yaad rakhega
use kahna ki wo gulshan
jis ke phulon ki KHub-surati dekhne walon ki aankhon ko bhi
KHubsurat bana deti thi
aur jis ki mahak
sans mein bhi KHushbu ghol deti thi
use ab
unghte bulbul hasrat se tak rahe hain
wo bulbul jinhon ne gulshan mein bahaar ke naghme
gae the
jin ki surili aawaz par titliyan phulon ke gird raqs karte karte
qaus-e-quzah ko bhi sharminda kar deti thin
lekin ab mausam badalte hi na jaane wo titliyan
phulon ka mazaq uDa kar kis des ko ja basin
dastan-e-hijr suna kar zara ghaur se dekhna
ki un jhil si aankhon ka rang pila paD jata hai ya ki
nila hi rahta hai
aur sabr se sunna ki
un gulabi honTon se bhaunre ke shauq mein
aah nikalti hai ya ki wah