Jarahaton Ki Malahaton Se Mata-e-dil KHub-ru Karenge, Urdu Ghazal By Saeed Soharwardi

jarahaton ki malahaton se mata-e-dil KHub-ru karenge
hum apne daman ki dhajjiyon se hazar daman rafu karenge

shua-e-barq-o-sharar le kar jamal-e-rang-e-bahaar le kar
nigar-e-farda ko husn denge bashar ko hum surKH-ru karenge

hamara gham hai wo bar-e-hasti jise malaek uTha na paen
jahan pe chhalke hamare saghar farishte us ja wuzu karenge

hamare sine ke tez shoalon mein pal rahe hain hazar gulshan
jahan se guzrenge apne nale faza ko wo mushk-bu karenge

karenge qabu mein bijliyon ko rakhenge paband aandhiyon ko
KHizan-girafta gulon ko ek din kamal-e-sad-rang-o-bu karenge

uruj-e-zauq-e-nazar se hongi tajalliyan kitni aashkara
har ek zarre ki quwwaton ko nisar-e-zauq-e-numu karenge

nashat-o-nikhat-ba-dosh shoale hamare naghmon ki aabru ban
rakhenge sham-e-hayat raushan bahaar ki justuju karenge