Ret, Urdu Nazam By Saeeduddin

ret par soya hua hai aadmi
us mein sire se koi jumbish hi nahin
mujhe haul hota hai
main us ke pas jata hun
wahan ret ka ek Dher hota hai

main us Dher ko hath se chhuta hun
mere panje ka nishan ret par ban jata hai
phir ye nishan
pani se nikli hui machhli ki tarah taDapne lagta hai
aur kuchh der baad sakit ho jata hai
mere hath se chipki ret
jab mere sath sath chalti rahi hai
main ne use kai bar hath se jhaDna chaha
bar bar hath ko pani se dhoya bhi
lekin ret hath se chhuTti hi nahin
rah chalte hue main apna hath
jeb main chhupa kar chalta hun
lekin musafah karne ke liye to
hath jeb se nikalna hi paDta hai
mujh se musafh karne ke baad
koi aadmi pahle jaisa nahin rahta
kuchh dur ja kar
wo apne hath se lagi ret ko
jhaDne ki koshish karta hai
aur ret ke Dher mein tabdil ho jata hai
har gali aur mohalle mein
har ghar ki dahliz par
aap ko ret ke ye Dher dikhai denge
un par meri ungliyon ke nishan bhi milenge
KHud meri piTh par bhi
aisa hi ek nishan hai

ek din ye sare Dher yakja kar diye jaenge
ek baDa sa Dher bana diya jaega
ye sara kaam
ek shaKHs tan-e-tanha karega
phir wo Dher par bane us nishan ko
uTha kar apni jeb mein rakh lega