Mohabbat Borhi Nahi Hoti, Urdu Nazam By Safia Hayat

پانیوں میں گھری مخلوق

ایک خاص بھوک کے ساتھ رہتی ھے۔

اور کشکول پکڑے صدا لگاتی ھے۔

خدارا !!! بھیک میں دے دو۔

ھراساں کھڑا ھر کوئی سوچتا ھے۔

جسے دیکھو

جسے ملو

جس سے بھی بات کرو

باتوں کے سارے

رمز اشارے

آنکھیں ملتے بیدار ھوجاتے ھیں۔

جسموں میں پلتی

روحوں میں سوئی جاگی

یادوں کے پائیں باغ میں

کسلمندی سے پڑے پڑے

انگڑائی لیتی جاگ اٹھتی ھے۔

صاحب! یہ کچھ اور نہیں

محبت کی بھوک ھے

جو ذرا سی آھٹ سے

چوڑیو ں کی کھن کھن سے

پائل کی چھن چھن سے

کلون کی خوشبو سے

سگار اور سگریٹ کے دھوئیں سے

آنکھوں کی تپش سے

کرنٹ زدہ ہاتھ کی جنبش سے

بدن کی مٹی میں

جاگ اٹھتی ھے۔

ازل سے ابد تک رھے گی۔

خراماں چلتی

کائناتی گیت گاتی انگشت بدنداں

اکثر یہ کہتی ھے۔

محبت وہ ازلی بھوک ھے۔

جو ہر لمحہ بڑھتی ھے۔

کم نہیں ھوتی۔

یہ دلوں میں پلتی ھے

اور صاھب!

دل کبھی بوڑھے نہیں ھوتے