Maan Ki Dunya Ka Darbar, Urdu Nazam By Safia Hayat

جنگلوں میں آدم خور بھیڑیئےبڑھتے جارھے ھیں۔

یہ تازہ لذیذ خون کے رسیا

چاک پیٹ کی انتڑیاں نکال پھینکتے

دانتوں کو پتھروں پہ رگڑتے

نوکیلے بناتے

شیطان ذہنوں میں ہوس بھرتے

کمان میں رکھے تیروں پہ زہر چھڑکتے

شکار پہ نظر رکھے ھیں۔

دو پائے قطار باندھے

موت کے پرمٹ لے کر

اپنے اپنے پھندے گلے میں ڈال رھے ہیں۔

خواب تو زندگی کی چنری میں

رنگ بھرتے ھیں۔

مگر۔۔۔۔۔۔

افسوس صد افسوس

خواب دیکھتی آنکھوں سے

سپنے نوچ کر

درگاہوں میں چادریں چڑھاتے

خوابوں کے حمل ٹھہرنے کی دعا کی جاتی ھے۔

اور

دل دریاوءں میں تیرنے والے

من کی شانتی کے لئے

دور دور بھت دور

بے آب و گیاہ ٹیلے پہ

اطمینان قلب کے لئے

خوشبو بسے پیرھن میں لپٹے

چپ چاپ سے

اپنی دنیا بسا کر سو جاتے ہیں۔

بھیڑئے دانت کچکچا تے

بدبو دار خون پیتے ھوئے

رات کے لئے ھمسفر کو تلاشتے

باھر سڑکوں پہ اندھا دھند فائرنگ کرتے

نسلوں کی نسلیں اجاڑ دیتے ھیں

من کی دنیا کے باشندے

آنکھیں موندے

شہہ رگ میں

بیٹھے ھوئے کا ہاتھ تھام کر

نیلے سائبان کی لپکتی روشنیوں میں

سفر در سفر کرتے

بوسیدہ رازوں کے راز آشکار کرتے

محو رقص رھتے ھیں۔

ادھر۔۔۔۔۔۔۔۔

ٹوپیوں کی سفیدی منافق ھوتی ھے۔

ادھر۔۔۔۔

ان کے سیاہ لبادوں میں

ریشم کا کیڑا نور کے ہالے بننے لگتا ھے