Hui To Ja Dil Mein Us Sanam Ki Namaz Mein Sar Jhuka Jhuka Kar, Urdu Ghazal By Shad Lakhnavi

hui to ja dil mein us sanam ki namaz mein sar jhuka jhuka kar
haram se but-KHane tak to pahuncha KHuda KHuda kar KHuda KHuda kar

lahad mein kya zikr raushni ka sar-e-lahad bhi jo rahm kha kar
jala kiya jab charagh koi hawa ne ThanDa kiya bujha kar

nishan-e-barbaad-gan-e-alam jo puchhe sahra mein hum ne ja kar
saba se uD uD ke gard baiThi bagule uTThe hawa mein aa kar

jo chashm-e-anjam-e-bin se dekha bahaar do din hai phir KHizan hai
maal-e-gulshan pe roi shabnam hanse gul-e-tar jo khil-khila kar

buton ki pur-ab ankhDiyon mein khula ye dekha jo putliyon ko
ye wo hain hindu dharam jaman se phire jo ganga chale naha kar

KHayal-e-hajj-e-haram ko chhoDa suna jo shah-e-rag se hai qarin-tar
tawaf-e-dil hi kiya kiye hum gae na kabe ko pher kha kar

zamin mein ai 'shad' mar gae par falak dabae to kya gila hai
miyan-e-turbat hamare pahlu hamein dabaate hain murda pa kar