Tabdili-e-mizaj Ko Aab-o-hawa Mile, Urdu Ghazal By Shehla Khan

tabdili-e-mizaj ko aab-o-hawa mile
sagar mein jo kashish hai pahaDon pe kya mile

main sipiyan hi chunti hun sahil ki ret se
main DhunDhti hi kab hun ki moti paDa mile

aamada hi nahin hai parinda rihai par
zanjir TuT jae ya pinjra khula mile

andar ki toD-phoD ne ta'mir kar diya
ab is se baDh ke aur bhala kya saza mile

ek main nahin akeli sarabon ke shauq mein
apne 'alawa aur kai mubtala mile

hamdard ban ke sunte hain sab ki kahaniyan
mazmun likhne ke liye kuchh to naya mile

aankhon mein ek ashk hi rakkha sanbhaal ke
dekha na koi KHwab to ta'bir kya mile

derina doston ka kabhi to KHayal kar
ye kya ki jab mile to sabhi se KHafa mile

goya sukun-e-qalb 'ata kar diya gaya
sad-shukr hai KHuda ka hamein mustafa mile