Tabut Nagar, Urdu Nazam By Siddiq Alam

mujhe pata bhi na chala
aur main tabut-nagar aa gaya

ye itna mubham bhi na tha
tabut-nagar
jis ki galiyon mein
insan apni parchhaiyon se kaT jate hain

tabut nagar ke chaar chob darwaze aur dariche
insanon ke muntazir hain
jo apne gharon mein dafn hain
jab yaKH-basta hawaen Takraati hain un gharon se
to ye log apni badbu-dar sans
kisi ghubare ki tarah apne andar bhar lete hain
jab log apni KHamoshi se ukta jate hain
shor ki talash mein
diwaron ko toD kar
bahar nikal aate hain
apne azim maqsad ki aaD mein
ek dusre ko dar se laTkate hain

mujhe pata bhi na chala
aur main tabut-nagar aa gaya
pichhli raat
kyunki har insan ki ek pichhli raat hoti hai
jab bille rote hain
jab KHana-zad makDi jala bunti hai
jis ke markaz mein chamak uThta hai chand
jab insanon ke andar ke jhaD jhankar
un ke kanon nathnon se
un ke dahan aur maq'ad se
bahar nikal aate hain
jab zahrile kukurmutte ugte hain
un ki shiryanon se
jinhen apni zarurat ke mutabiq
wo apne chaugath par sajate hain
KHubsurat rangon se rangte hain
KHubsurat lafzon se Dhak kar
duniya ke samne late hain

pichhli raat
kisi ne kaha tha
ab is raat ka matam be-kar hai
waqt aa chuka hai ki log
apne tabut se uThae jaen
dho dhula kar achchhe kapDe pahnae jaen
nae sire se dafnae jaen
is ki zarurat aa chuki hai
ki tariKH se logon ke na-jaez qabze haTae jaen

to main ne nafi mein sar hilaya
ye hamare KHun mein hai
ye jarsume kabhi nahin marte
inhen bar bar ji uThne ki lat hai
inhen bar bar dafnana zaruri ho jata hai
aur main mez se uThne wala aaKHiri shaKHs na tha
jise apne tabut ke andar jaana tha
na ye aaKHiri bar tha ki mujhe tabut se bahar aana tha
na ye aaKHiri bar tha ki nae sire se
ek nae matam ke sath ek nae katbe ke sath
mujhe ek nae tabut mein apna ghar basana tha

aur mujhe pata bhi na chala
main tabut-nagar aa gaya