Asia Jag UTha, Urdu Nazam By Siddique Kaleem

asia jag uTha KHwab-e-giran se kaise
dil-nashin jism mein ek zahr ka tufan liye
kenchuli badle hue sanp ki phunkar liye
har shaqawat ke liye maut ka saman liye
asia jag uTha
ahl-e-mashriq ko nai zist ki phir se hai talash
ye taDapte hue gunge ye bilakte haiwan
apne aaqaon ke derina ghulamon ki ye lash
zulm toDa kiya insan pe sadiyon insan
zist be-nur charaghon mein se lau de uTThi
ek kiran sard andhere mein se zau de uTThi
asia jag uTha
ahl-e-mashriq ki taraqqi ke payambar larze
kapkapane lage aiwanon ke sangin sutun
wo jahan naz bhi naKHwat hai masarrat bhi ghurur
jin mein nikhra kiya insan ki talli ka junun
sal-ha-sal se tapte hue faulad ke raaz
sal-ha-sal se fankaron ke tarshe hue but
rah na jae kahin mashriq mein hi maghrib ki ye rut
ahl-e-mashriq pe shaqawat ki koi had hi nahin
apne dushman ki zalalat ki koi had hi nahin
asia jag uTha
apni zillat ke samet apni hifazat ke liye
is qadamat ke samet apni saqafat ke liye
asia arz-e-muqaddas bhi farozan hogi
hum gharibon ki ghamin zist bhi taban hogi
asia jag uTha jag uTha jag uTha