Khooj, Urdu Nazam By Sidra Afzal

میں اپنا نام اور پیدائش

کھوج رہی ہوں

ایک ایسی خوردبین سے

جس میں

پچیسویں صدی کی آنکھیں

لگی ہوئی ہیں

وہ آنکھیں جن کی پتلی سفید

اور سکلیرا سیاہ ہے

وہ آنکھیں جو دور تک

دیکھ سکتی ہیں اور

آٹھواں رنگ پہچان سکتی ہیں

جنہیں بائسویں صدی نے

دریافت کرنے کا دعویٰ کیا تھا

مگر یہ المیہ

جس کی کوکھ

وقت کے وجود سے خالی ہے

میری پیدائش کے لمحے کو

کسی کلینڈر میں

نشان زد کرنے سے قاصر ہے

شاید میرا جنم

تین سو سڑسٹھویں دن کے

کسی غیر مطبوعہ لمحے میں ہوا تھا

جسے تشہیر کرتے ہوئے

خدائے اصلی

اپنی لا محدودیت کی دہائی دیتا رہا

اور خراج لیتا رہا

مگر پھر

پلوٹو کی سرد آہیں خاموش ہو گئیں

سرخ پتھر والے

سرخ پتھروں میں چن دئے گئے

وجودیت

پا شکستہ وجود سے

ما بعد وجودیت کی

تاویلیں گڑھتی رہی

اور میں

اپنی کھوج کے پاتال میں

جنموں کی کہانی دہراتے دہراتے

نظام شمسی کے دائرے سے

باہر جا پڑی

بے کناریت کے سمندر میں

جہاں ہر نتیجہ صفر ہے