Ashiyan Thay Shakhoon Per Jin K Ik Zamane Sey, Urdu Ghazal By Tabassum Anwaar

آشیاں تھے شاخوں پر جن کے اک زمانے سے

ہو گئے سبھی بے گھر اک شجر گرانے سے

شاد کام رہتا ہے راہ _ رائگانی میں

فیض جس نے پایا ہو عشق آستانے سے

زلزلوں کی زد میں ہے قصر _ شاہ کی بنیاد

شہر میں قلندر کے بوریا بچھانے سے

زندگی کی کٹھ پتلی ہے جمود کی طالب

پر خدا نہ باز آئے ڈوریاں ہلانے سے

میر ے نقش گہرے ہیں میرے رنگ پکے ہیں

مٹ نہیں سکوں گی میں آپ کے مٹانے سے

خاک کی فضیلت کو رفعتیں نئ دوں گی

کوزہ گر کیوں جھجھکے ھے تو مجھے بنانے سے

خامشی کے جنگل میں خود سے ملنے جانا ھے

لمحے کچھ چرا لوں میں شور کے خزانے سے

رنگ و نور و نکہت سے یہ فضائیں عاری تھیں

جی ا ٹھا ہر اک منظر اک تمھارے آنے سے

کچھ چراغ لائی ہوں جھیل پر امیدوں کے

دل مراد پاتے ہیں یوں دئیے بہا نے سے

ہجر مجھ پہ طاری ہو تو وہ پھل نہیں دیتا

گھر کا پیڑ ہے ہمدم میرا اک زمانے سے

اب مجھے مرے احباب بے وفا نہیں لگتے

باز آ چکی ہوں میں دوست آزمانے سے

چاہے کوئی موسم ہو زخم سبز رکھتی ہوں

دیکھنے وہ آتا ہے مجھ کو اس بہانے سے

خوف و ڈر مرے دل سے کس طرح نکالو گے

تم چھڑا تو لائے ہو مجھ کو قید خانے سے

تو جو لوٹ آیا تو سانس لی تبسم نے

زندگی معطل تھی تیر ے روٹھ جانے سے