Tum Nazuk Si Ek Aurat Ho By Bariyah

روتی آنکھوں سے تجھ کو یوں

گودی میں ماں کی رکھا تھا

بولا تھا تم پہ بوجھ ہے یہ

قسمت میں جو بھی لکھا تھا

تیری ذات کے نہ ہونے کا غم

ماں کی آنکھوں میں دکھتا تھا

اس غم کو پیار سے سینچ کے ہی

دکھ میں بھی ہار نہ دیکھ کے ہی

تیری ماں نے تجھ سے بولا تھا

ان آڑی ترچھی نظروں سے

ان سرد مہر سے لہجوں سے

گھبرانا نہ میری گڑیا تم

بس ہمت کرتی جانا تم

اک دن تو ایسا آئے گا

ہر کوئی تجھے اپنائے گا

تیری ذات کے نہ ہونے کا غم

میرے اندر سے مٹ جائے گا

اس کم عمر کی بازی میں

تیرے ہونے کی ناراضی میں

کیا قدم تیرے لرزائے تھے

تیرے عزم کو روک کیا پائے تھے

شورش کو تھام کے دنیا کی

پھر پوچھو اپنے اندر سے

تم نازک سی اک عورت ہو

بند باب ہوا کم عمری کا

دیکھا نیا رنگ دنیا کا

عمر سیڑھی چڑھتے جانے سے

اور جیون کے آزمانے سے

تیری ہمت آہن کم نہ ہوئی

نئی صفوں میں ہر دم بڑھتی گئی

لوگوں نے تجھ سے یہ تھا کہا

تو صنف نازک ہے میری جاں

یہ تجھ سے ہو نہ پائے گا

لوگوں نے تجھ سے یہ تھا کہا

تیری عمر کی گہری ریکھائیں

تیرے چہرے کو سجاتی ہیں

تیری ہمت کا بتلاتی ہیں

اب تجھ سے ہو نہ پائے گا

ہر چوٹ پہ بھی ہر ضرب پہ بھی

کئی کڑوی باتیں پی کر بھی

ہر رشتے کو تو سجاتی گئی

وفا کی رسم نبھاتی گئی

اس رنگ برنگی دنیا میں

کیا قدم تیرے لرزائے تھے

تیرے عزم کو روک کیا پائے تھے

شورش کو تھام کے دنیا کی

پھر پوچھو اپنے اندر سے

تم نازک سی اک عورت ہو