Wo Bachpan Mujhe Yaad Aata Hai Ab Bhi By Jafar Hussain Jafar

وہ بچپن مجھے یاد آتا ہے اب بھی

رلاتا ہے مجھ کو ہنساتا ہے اب بھی

وہ اینٹوں کی کاریں بنا کر چلانا

وہ کانے کے گھوڑے کو سرپٹ دوڑانا

وہ کاغذ کی کشتی میں مچھر بٹھا کر

یوں بحری سفر کا مسافربنانا

میں خوابوں کے مسکن میں سوجاتاہوں جب

دریچوں میں ماضی کے کھو جاتاہوں تب

وہ سپنے سہانے دیکھاتاہے اب بھی

وہ بچپن مجھے یاد آتاہے اب بھی

رلاتا ہے مجھ کو ہنساتا ہے اب بھی

نہ جاڑے کی سختی نہ گرمی کی شدت

نہ ہی بادو باراں کا تھا خوف دل میں

نکلے جو گھر سے تو بس چل پڑے ہم

جدھر کو اٹھا منہ ادھر چل پڑے ہم

کسی کو بھی خاطر میں لاتے نہ تھےہم

سبھی دل جواں تھے اکیلے نہ تھے ہم

جو ساتھی میرے کل میرے ہمسفر تھے

بچھڑنا ہے ہم کو سبھی بےخبرتھے

جدائی کی آندھی میں یوں کھو گئے ہم

سبھی سوکھے پتوں کی مانند ہوئے ہم

نہیں بھولا مجھ کو ہواوں میں اڑنا

بنا سحری کھائے یوں راتوں کو مڑنا

وہ پیڑوں کی شاخوں کو جھولا بنا کے

بلندی سے پستی کی جانب اترنا

وہ ماچھو، عنائت وہ منڈا کا پانی

وہی ہے سبھی کچھ وہی ہے روانی

نہیں ہیں وہاں تو بس ہم ہی نہیں ہیں

وہ بچپن کی باتیں ہی کب رہ گئیں ہیں

وہ یادیں ہی باقی فقط رہ گئیں ہیں

تڑپ ان کی مجھ کو ستاتی ہے جب بھی

خیالوں میں اکثر میں جاتاہوں اب بھی

وہ بچپن مجھے یاد آتاہے اب بھی

رلاتا ہے مجھ کو ہنساتا ہے اب بھی

وہ ہم دم وہ ساتھی کہیں کھو گئے ہیں

اکیلے اکیلے سے سب ہو گئے ہیں

میں لاؤں کہاں سے انہیں ڈھونڈ کر اب

اچانک جو مجھ سے کہیں کھو گئے ہیں

ملیں گے کبھی ہم دوبارہ کسی دن

آئیں گے پھر وہ دوبارہ وہی دن

چلے تھے یوں بچپن میں جن راستوں پر

دوڑیں گے پھر ہم انہی راستوں پر

مرنے سے پہلے ملوں گامیں ان سے

یہی سوچ کر جی رہا ہوں اب بھی

وہ بچپن مجھے یاد آتاہے اب بھی

رلاتا ہے مجھ کو ہنساتاہے اب بھی

میری ماں کہاں ہو خدارا بتادے

جو ملنا ہے مشکل تو صورت دکھا دے

سننے کو تیری میں آواز ترسوں

دیکھے بنا تجھ کو بیتے ہیں برسوں

سناؤں کسے میں یہ حالات دل کے

ستاتی ہے دنیا مجھے ساتھ مل کے

آواز دے کےہی مسرور کردے

مجھے پھر سے اک بارمسحور کردے

خدا کا تو پرتو ہے تو میری ماں ہے

تیرے دل کا ٹکڑا ہوں تو میری جاں ہے

میری سانس تیرے ہی دم سے چلی ہے

مجھے زندگی جو عدم سے ملی ہے

جھریوں بھرے تیرے چہرے میں کیا تھا

مجھے لگ رہا ہے وہ نور خدا تھا

جھریاں نہیں وہ میری زندگی تھی

بعد از خدا وہ میری بندگی تھی

مزین میری زندگی ہے انہی سے

عمارت کھڑی ہے تیری اس جبیں سے

یہ سچ ہے کہ تجھ کو ستایا بہت تھا

یہ سچ ہے کہ تجھ کو رلایا بہت تھا

احسان کر مجھ پہ ناراض ہو لے

دکھانے کو میرے یوں تھوڑا سا رو لے

تیرے آنسوؤں پہ میں جاں کو لٹا دوں

مجھے ڈانٹ دے پھر یہ خواہش ہے اب بھی

کیوں نہ جعفر تیری عظمتوں پر فدا ہو

ہے جنت میری تیرے قدموں مین اب بھی

وہ بچپن مجھے یاد آتا ہے اب بھی

رلاتا ہے مجھ کو ہنساتا ہے اب بھی

زمانے سے کتنا الگ باپ تھا وہ

محبت میں اپنی مثال آپ تھا وہ

جہاں میں کوئی اس سے بڑھ کے نہیں ہے

مجھے لگ رہا ہے وہ اب بھی یہیں ہے

میں مایوس ہوں یا پریشان جب بھی

وہ کرتے ہیں میری مدد آج اب بھی

وہ بچپن مجھے یاد آتا ہے اب بھی

رلاتا ہے مجھ کو ہنساتا ہے اب بھی