Mehbooba Ki Tasveer Se By Nazim ZarSinner

میری محبوبہ ترے قرب کی نیلی راتیں

تیرے ہونٹوں پہ دمکتی ہوئی مسکان کی یاد

تیری زلفوں کی گھٹاؤں میں مہکتے ہوئے پھول

تیری سنگت میں گزارے ہوئے طوفان کی یاد

اپنی بانہیں اِسی الماری کے سائے میں کبھی

تم نے گردن میں مری ایک سحر ڈالی تھیں

اِسی کرسی پہ جو فانوس کے نیچے ہے پڑی

بیٹھ کر تم مجھے بس دیکھتی ہی رہتی تھیں

جانتی ہے یہی کھڑکی کہ گرے پردوں میں

مسکراتی ہوئی یادیں ہیں مُقَیَّد کتنی

مہکے جذبات کی پردوں پہ بھڑکتی ہوئی آنچ

مجھ کو لگتی تھی جو سرما کی ہوا سے ٹھنڈی

تم کو غُصَّے سے منانے کے لیے وہ بوسہ

زور سے جو ترا آنچل ہٹا کے میں نے لیا

میری عادت تھی غزل تم کو سنانا ہر روز

کتنے اشعار پہ یاد آتا ہے ہنسنا تیرا!

تم تو مُدَّت ہوئی اِس کمرے میں آئی ہی نہیں

کمرہ اور دل مرا ویران پڑے ہیں تم بن

دیکھ کر تیرگی کمرے کی تم اِک پل کے لیے

سوچ سکتی ہو کبھی دیپ جلے ہیں تم بن؟

جس جگہ تیری مَحَبَّت کا سمندر تھا کبھی

اب واں صحرا ہے، سرابوں کے سوا کچھ بھی نہیں

جہاں غزلوں کی حسینہ کا مُجَسِّم تم تھیں

وہاں خاموش کتابوں کے سوا کچھ بھی نہیں

تیری زلفوں کی گھٹائیں جہاں پر برسی تھیں

وہ زمیں اب بھی اُنھیں قربتوں کی پیاسی ہے

وہ جو پیتی تھی تری آنکھوں کے مے خانے سے

وہ نظر اب بھی اُنھیں ساغروں کی پیاسی ہے

تیری قربت تری الفت کے سہانے لمحے

تیری صورت کی طرح اب مجھے یاد آتے ہیں

میری نظریں ہیں تمھیں ڈھونڈتی رہتی ہر سمت

چومنے کی تمھیں خواہش مرے لب رکھتے ہیں

تیرے کپڑے سبھی محفوظ ہیں الماری میں

تیرے زیور پہ ترے بن ہے اداسی چھائی

تیرے کنگن تری پازیبیں تری چوڑیاں بھی

تھیں ترے جانے پہ جیسی ہیں ابھی تک ویسی

چاند تاروں سے میں بہلاؤں دل اپنا کیسے؟

چاندنی تیری طرح گیت نہیں گا سکتی

جاگتا رہتا ہوں میں دیکھ کے سونا بستر

دیکھے بن تم کو مجھے نیند نہیں آ سکتی

تم کہاں اور ہو کس حال میں کیسے جانوں؟

تیری تصویر مجھے کچھ نہیں بتلا سکتی

میں وہاں ہوں جہاں کچھ بھی نہیں آتا ہے نظر

تم وہاں ہو جہاں آواز نہیں جا سکتی