Garmi Ki ChhuTTiyan, Urdu Nazam By Afsar Merathi

mushkil se phir school na jaane ke din aae
be-fikri se phir waqt ganwane ke din aae

phir raat ko chhup-chhup ke Darane ke din aae
sahme hue logon ko banane ke din aae

phir baiTh ke tabla sa bajaane ke din aae
phir laTe ke tanhai mein gane ke din aae

har subh ko phir bagh mein jaane ke din aae
tu kah ke wo koyal ko chiDhane ke din aae

phir aam ka achaar banane ke din aae
phir chhup ke kahin kairiyan khane ke din aae

kar di thi kitabon ne hamari to zaban band
ghar bhar mein phir ek shor machane ke din aae

wo din gae KHush rahne ko jab bhule hue the
hansne ke din aae hain hansane ke din aae

ab waqt ka rona nahin ab waqt bahut hai
har kaam mein phir der lagane ke din aae

ghar par bhi the ghere hue school ke dhande
aazadi se ab mauj uDane ke din aae

bahnon ko sataya kabhi bhai ko chiDhaya
laDne ke din aae hain laDane ke din aae

phir phulon se ladne laga har bele ka pura
paudon mein se phir phul churane ke din aae

khole gae phir gard se lipTe hue parde
dopahar ko phir raat banane ke din aae

phir luTenge hum chandni raaton ki bahaaren
phir chhat pe palangon ke bichhane ke din aae

kyon ab bhi pasine mein sharabor ho 'afsar'
nadi pe kahin ja ke nahane ke din aae