Aik Manzoom Taruf, Urdu Ghazal By Ahmed Ali Barqi Aazmi

پوچھتے ہیں مجھ سے وہ میرا تعارف کیا کہوں

میرے والد برق تھے اور میں ہوں برقی اعظمی

شہرِ اعظم گڈھ ہے یوں تو میرا آبائی وطن

کھینچ لائی شہرِ دہلی میں زبانِ فارسی

ریڈیو کے فارسی شعبے سے ہوں اب مُنسلک

ضوفگن ہے برقی سے برقی کے فن کی روشنی

اردو کی ویب سائٹوں پر کرتا ہوں عرضِ ہُنر

میرا فطری مشغلہ ہے چونکہ عصری آگہی

میری خوئے بے نیازی ہے مجھے بیحد عزیز

میرے ادبی ذوق کی مظہر ہے میری شاعری

ہوتا میں بھی گر زمانہ ساز تو سب جانتے

ہوں مقامی سطح پر اب تک شکارِ بے رُخی

یوں تو ہوں اربابِ دانش میں سبھی سے روشناس

مجھ کو شاید وہ سمجھتے ہیں ابھی تک مبتدی

ہیں فصیلِ شہر سے باہر ہزاروں قدرداں

باعثِ ذہنی سکوں ہے اُن سے میری دوستی

میرے والد کا تصرف ہے مرا عرضِ ہُن

ر ان کے فکر و فن کی ہے میرے سخن میں تازگی

جملہ اصنافِ سخن سے یوں تو ہے مجھ کو لگاو

ہے یہ یادِ رفتگاں وجہہِ نشاطِ معنوی

پہلے موضوعاتی تھا عرضِ ہُنر کا دایرہ

میری غزلوں میں بھی ہے جس سے تسلسل آج بھی

نام گلہائے سخن کا ہے مرے روحِ سخن

روح کو ہوتی ہے حاصل جس سے اک آسودگی

شہر اعظم گڈھ ہے برقی یوں تو میری زادگاہ

شہرِ دہلی میں بسر کرتا ہوں اب میں زندگی