Ishq Hai, Urdu Ghazal By Ahmed Alvi

اولا اوبر میں انہیں دن بھر گھمانا عشق ہے

اور کرایہ جیب سے اپنی چکانا عشق ہے

رات بھر تھانے کے اندر مار کھانا عشق ہے

مار کھاکر بھی ہمیشہ مسکرانا عشق ہے

چائے پینے کے بھی چاہے جیب میں پیسے نہ ہوں

آسماں سے چاند لیکن توڑ لانا عشق ہے

سر کو بیوی کے دبانا یہ ہے فرض شوہری

پاؤں محبوبہ کے خوش ہوکر دبانا عشق ہے

بس میں ڈی ٹی سی کی چلنا اک طرح کا ہے جہاد

میٹرو کی سیڑھیوں پر بیٹھ جانا عشق ہے

دیکھ کر خونخوار کتّے گیٹ پر محبوب کے

اپنی عزت کو بچا کر بھاگ آنا عشق ہے

پانچ پیدل گود میں دو آٹھ بچے گھر پہ ہیں

ایک دو والا نہیں ہے یہ پرانا عشق ہے

عاشقوں کی یہ بھی لکھا ہوتا ہے تقدیر میں

بن کے ماموں ان کے بچوں کو کھلانا عشق ہے

عاشق و معشوق فرضی فرضی ہیں ہجر و وصال

یہ حقیقی شاعروں کا شاعرانہ عشق ہے

درجنوں سینڈل کی تجھ پہ جوڑیاں ہوتے ہوئے

”وہ ترا کوٹھے پہ ننگے پاؤں آنا عشق ہے “